Jalgaon News: खानदेशात केळी पट्टा उष्णता व उष्ण वाऱ्यांमुळे होरपळला. या उष्णतेत बागा वाचल्या, पण आता बागांमध्ये काढणीचा हंगाम लांबला आहे. यंदा फेब्रुवारीतच सरासरी तापमान दोन अंश सेल्सिअसने अधिक होते. केळी बागांची ३० ते ३५ टक्के हानी यात झाली असून, कोट्यवधी रुपयांचे नुकसान झाले.

बागांच्या वाढीवर परिणाम झाला. यामुळे बागा उशिरा निसवल्या किंवा निसवण व अन्य क्रियांनाही अडचण आली. कांदेबाग बहर केळीची लागवड सप्टेंबर ते नोव्हेंबर या कालावधीत केली जाते. या कालावधीत लागवडीच्या बागांतील निसवण मे, जूनमध्ये होते. पण निसवण यंदा लांबली. वेळेत निसवण न झाल्याने काढणी हंगामही लांबला आहे.

खानदेशात मृग बहर व कांदेबाग केळी बागा आहेत. मृग बहर बागांची लागवड मागील वर्षी मे ते जुलै या कालावधीत झाली होती. आता कांदेबाग केळी पीक नऊ ते १० महिन्यांचे आहे. तर मृग बहर बागांची वाढ होत आहे. यात मृग बहर केळी बागांच्या वाढीसही एप्रिल व मेमधील उष्णतेने बाधा आली. कारण केळी पीक ४० अंश सेल्सिअसपेक्षा अधिक तापमानात तग धरत नाही. सिंचन, खत व्यवस्थापन काटेकोरपणे करूनही अति उष्णतेत बागांची हानी होते.

फेब्रुवारीतच उष्ण झळा वाढल्या होत्या. एप्रिलमध्ये सकाळी आठ ते सायंकाळी सहापर्यंत तापमान अधिक होते. या काळात काही दिवस कमाल तापमान ४५ अंश सेल्सिअस होते. एप्रिलमध्ये सात दिवस कमाल तापमान ४३ अंश सेल्सिअसपेक्षा अधिक होते. मे महिन्यातही कमाल तापमान काही दिवस ४२ अंश सेल्सिअसपेक्षा अधिक राहिले.

यामुळे बागांची वाढ खुंटली. त्याचा परिणाम आता कांदेबाग केळीच्या काढणी, निसवणी हंगामात दिसून येत आहे. कांदेबाग बहर केळी जळगाव जिल्ह्यात जामनेर, चोपडा, जळगाव, यावल, भडगाव, पाचोरा, चाळीसगाव भागात अधिक आहे. २५ ते ३० हजार हेक्टरवर या बागा आहेत. सध्याच्या स्थिर, चांगल्या दरांचा लाभ उत्पादकांना मिळत नसल्याची स्थिती आहे.