Pen News : पेण तालुक्यातील बाळगंगा धरणाचे काम जवळपास ८० टक्के पूर्ण झाले आहे, मात्र येथील प्रकल्पग्रस्तांचे प्रश्न आजही तसेच असल्याने शासनाच्या उदासीन धोरणावर टीका करण्यात येत आहे, शिवाय बाळगंगा धरणाचे कामदेखील रखडले असल्याचे बोलले जात आहे.

तर या धरण प्रकल्पाबाबत मागील १५ ते १६ वर्षे रखडलेल्या कामामुळे येथील प्रकल्पग्रस्तांच्या अनेक समस्या निर्माण झाल्या असून, यामध्ये आदिवासी समाजाचे मोठ्या प्रमाणावर नुकसान झाले आहे. त्‍यामुळे शासनाने अधिक लक्ष देत उर्वरित शिल्लक राहिलेले धरणाचे काम लवकरात लवकर पूर्ण करावे, असे पेणचे आमदार रवीशेठ पाटील यांनी विधिमंडळात नुकताच प्रश्न उपस्थित केला आहे.

तालुक्यातील बाळगंगा धरणासाठी जावळी, वरसई, करोटी, निधवली, गागोदे, वाशिवली या एकूण सहा ग्रामपंचायती हद्दीतील नऊ महसुली गावे आणि १३ आदिवासी वाड्यांचा यात समावेश आहे. तसेच जवळपास तीन हाजारांहून अधिक कुटुंबे विस्थापित होणार आहेत. विशेष म्हणजे या प्रकल्पात आदिवासी समाजाची संख्या लक्षणीय आहे. त्‍यामुळे बाळगंगा धरण प्रकल्पासाठी येथील शेतकऱ्यांच्या जमिनी संपादित करण्यात आल्या आहेत.

मात्र शासनाने त्‍यांच्याकडे अद्यापही लक्ष न दिल्यामुळे येथील अनेक समस्या आजही तशाच पडून आहेत. त्यातच शासनाकडून येणारे अनेक उपक्रम इतर भागांमध्ये राबविले जातात, परंतु या भागात राबवता येत नसल्याने येथील शेतकरीबांधवांना अनेक योजनेपासून वंचित राहावे लागले आहे.

त्यामुळे मागील १५-१६ वर्षे या बाधित धरण प्रकल्पग्रस्तांच्या गावांचे आजतागायत पुनवर्सन तसेच योग्य जमिनीचा मोबदला, पुनर्वसनासाठी प्लॉटचे वाटप, घरांच्या किमती, पुनर्वसन आराखडा आदी सर्व प्रश्न अद्यापपर्यंत सुटलेले नाहीत. त्‍यामुळे शासनाच्या उदासीनतेमुळे बाळगंगा धरणाचे काम रखडले असल्याचे बोलले जात आहे. त्यामुळे सरकारने बाळगंगा धरण प्रकल्पाची सुरुवात तत्काळ करावी व धरण पूर्ण करून प्रकल्पग्रस्तांना न्याय द्यावा, अशी मागणीही करण्यात आली आहे. बाळगंगा धरण प्रकल्पाबाबत राज्याचे मुख्यमंत्री यांच्याबरोबर जानेवारी महिन्यातच बैठक झाली आहे.