Pune News : तालुक्याच्या पश्चिम पट्ट्यातील अनेक गावांमधील बाजरीच्या पिकाचे मोठे नुकसान झाले आहे. गेल्या आठ दिवसांपासून सुरू असलेल्या पाऊस आणि वाऱ्यामुळे हातातोंडाशी आलेल्या बाजरीच्या पिकाचे मोठे नुकसान झाले आहे.

अनेक वर्षांनंतर यंदा पावसाने दमदार हजेरी लावली आहे. खरीप हंगामातील बाजरी पिकासाठी हा पाऊस फारच उपयुक्त ठरल्यामुळे हे पीक चांगलेच जोमात आले आहे. तसेच, ठरावीक अंतराने पडलेल्या पावसामुळे बाजरी पिकाची चांगली जोपासनाही करता आली.

त्यामुळे अगदी फुलोऱ्यात येऊन दाणे भरेपर्यंत हे पीक सुरक्षित होते. बाजरीच्या पिकाचे क्षेत्र जास्त असल्याने पाखरांचा त्रासही अगदीच नगण्य होता. या सर्व गोष्टींमुळे बाजरीचे चांगले उत्पादन मिळण्याची आशा शेतकऱ्यांमध्ये वाढली होती.

काही दिवसांतच बाजरी काढणीला येणार असल्याने त्याचे नियोजन शेतकरी कुटुंबांतून सुरू असतानाच गेल्या आठ दिवसांपासून पावसाने जोर धरला. दिवसभर पावसाच्या सरींवर सरी आणि रात्री जोरदार पाऊस असे निसर्गाचे गणित मागील आठवडाभर सुरू होते.

जोमात असलेल्या पावसामुळे जमिनीतील वाढती ओल आणि वाऱ्याचा वाढता वेग यामुळे अनेक भागातील बाजरीचे पीक आडवे झाले आहे. नुकतेच दाणे भरलेली कणसे अद्याप परिपक्व झाली नसल्याने बाजरीची काढणी करणेही शक्य नाही. त्यामुळे चांगले आलेले पीक डोळ्यादेखत मातीमोल होताना पाहायची वेळ शेतकऱ्यांवर आली आहे.

कृषी विभागाच्या मते ज्या लोकांनी बाजरीला पाणी दिले आहे, बहुदा त्यांचीच पिके आडवी झाली आहेत. मात्र पाणी न दिलेलीही अनेकांची पिके जमीनदोस्त झाली असल्याचे अनेक शेतकऱ्यांचे म्हणणे आहे. यवत आणि भरतगावाच्या शिवारात बाजरीचे अधिक नुकसान झाल्याचे शेतकऱ्यांचे म्हणणे आहे.