Amaravati News : अमरावती शहर मानवाच्या प्रगतीसोबत पक्ष्यांच्या अधिवासासाठी देखील पोषक असल्याचे संशोधनातून सिद्ध झाले आहे. श्री शिवाजी विज्ञान महाविद्यालयाचे डॉ. गजानन वाघ यांनी नुकतेच अमरावती शहरातील विविध बगीचे, शासकीय, निमशासकीय संस्था परिसर व मोकळ्या जागांवर आढळणाऱ्या पक्षांचा अभ्यास केला. यात जवळपास १४१ प्रजातींच्या पक्ष्यांची नोंद घेण्यात आली.

गजानन वाघ व त्यांच्या चमूने शहरातील जवळपास १६ विविध ठिकाणांवर पक्षिनिरीक्षण करून पक्षांच्या नोंदी घेतलेल्या आहेत. यामध्ये २६ स्थलांतरित पक्षी प्रजाती आढळल्या असून पांढऱ्या मानेचा करकोचा, रावण पोपट, युरोपियन रोलर हे आयूसीएनच्या धोकादायक यादीतील पक्षांचा अधिवास अमरावतीत असल्याचा निष्कर्ष समोर आला आहे.

डॉ यात पक्षांच्या विणीचा, अन्नाचा, रातथारा, तेथील वनस्पती व पर्यावरण आदी बाबींचा अभ्यास केला. या अभ्यासादरम्यान १४१ पक्षी प्रजातींपैकी ३८ पक्षी प्रजातींची घरटी आढळून आलेली आहेत. घरटी, पक्षांकरिता अन्न, बसण्याकरिता व रातथारा म्हणून वापर करण्यासाठी जवळपास ५२ वृक्ष प्रजातींच्या नोंदी घेतल्या.

पक्षांनी घरट्यांकरिता वड, पिंपळ, उंबर, पाखड, कडूलिंब, काटेसावर, बकान, आकाश कंदील, महारुख, आंबा, अशोक, साग, चिंच, बदाम, सिरस, चंदन, जांभूळ, पुत्रंजिवी, शिंदोली यासारख्या देशी वृक्षांची निवड केली. विशेष म्हणजे यात इंडियन ग्रे हॉर्नबिल (राखी धनेश पक्षी) या पक्षाचे सुद्धा घरटे आढळून आले.

संशोधनातील महत्त्वाच्या नोंदी

शहरामध्ये प्रथमच रातथारांचा अभ्यास

कबुतरांची वाढती संख्या चिंतेची बाब

रस्ते अपघात, उंच इमारतीचे काच, वीजस्पर्श, पतंगीचा मांजा ठरताहे जीवघेणे

वाढते तापमान, प्रदूषण, प्लॅस्टिक कचरा यापासून धोका