Bhayandar News : मिरा-भाईंदर महापालिकेकडून हाती घेण्यात आलेली अनेक विकासकामे कांदळवनामुळे थांबून राहिली आहेत. विकासकामात येणाऱ्या कांदळवनाच्या लागवडीसाठी वन विभागाला पर्यायी जागा उपलबध करून देणे आवश्यक आहे.

आतापर्यंत महापालिकेकडे अशी जागा उपलब्ध नसल्याने विकासकामांची प्रगती थांबली होती. आता उत्तन येथे नऊ हेक्टर जागा कांदळवन कक्ष पर्यायी जागा म्हणून निश्चित झाली आहे. त्यामुळे कांदळवनामुळे थांबलेली विकासकामे करणे शक्य होणार आहे.

मिरा-भाईंदर शहराच्या तीन बाजू खाडीने वेढलेल्या आहेत. त्यामुळे या ठिकाणी कांदळवन मोठ्या प्रमाणात आहेत. महापालिकेची अनेक आरक्षणे कांदळवन असल्यामुळे विकसित झालेली नाहीत. कांदळवनाची कापणी करण्यास कायद्याने मनाई आहे.

विकासकामांसाठी कांदळवन काढायचे असेल, तर त्यासाठी पर्यावरण विभाग, वन विभाग, तसेच उच्च न्यायालयाकडून परवानगी घ्यावी लागते. त्याचप्रमाणे जेवढी झाडे कापली जाणार आहेत, त्याबदल्यात त्याची लागवडही करावी लागते.

ही लागवड वन विभागाकडून केली जाते व त्यासाठी वन विभागाला पर्यायी जागा उपलब्ध करून द्यावी लागते. त्यासाठी प्रत्येक झाडामागे ३५ रुपये शुल्क वन विभागाकडून आकारले जाते. मिरा-भाईंदर महापालिकेकडे आतापर्यंत कांदळवन लागवडीसाठी पर्यायी जागा उपलब्ध नव्हती.