Solapur News : आषाढी यात्रेच्या पार्श्‍वभूमीवर पंढरपूर शहरातील सर्व रस्त्यांची दुरुस्ती करावी. रस्त्यावर एकही खड्डा दिसता कामा नये. रस्त्यांच्या दुरुस्तीसाठी नगरविकास विभागाने तातडीने १० कोटी रुपयांचा निधी द्यावा, यासह ७३ कोटी ८० लाख रुपयांच्या पंढरपूर मंदिर विकास आराखडा आणि ३६८ कोटी रुपयांच्या अक्कलकोट तीर्थक्षेत्र विकास आराखड्यास मान्यता देण्यात आली आहे.

मुख्यमंत्री एकनाथ शिंदे यांच्या अध्यक्षतेखाली राज्य शिखर समितीची बैठक झाली. त्यात हा निर्णय झाला.

उपमुख्यमंत्री देवेंद्र फडणवीस, महसूलमंत्री राधाकृष्ण विखे पाटील यांच्यासह खासदार डॉ. जयसिद्धेश्‍वर महास्वामी, आमदार समाधान आवताडे, आमदार सुभाष देशमुख, सचिन कल्याणशेट्टी, शहाजी बापू पाटील, राम सातपुते, रणजितसिंह मोहिते - पाटील, विठ्ठल - रुक्मिणी मंदिर समितीचे सहअध्यक्ष गहिनीनाथ महाराज औसेकर आदी या वेळी उपस्थित होते.

श्री. शिंदे म्हणाले, ‘‘मंदिराचे प्राचीन वैभव कायम ठेवत भाविकांची सुरक्षा आणि सोयीसुविधांची सांगड घालण्याचे काम करावे. घाट सुशोभीकरण, रस्ते दुरुस्तीसाठी यात्रा अनुदान १० कोटी रुपये केले आहे.’’

पंढरपूर मंदिर विकास आराखड्यात ७३ कोटी ८० लाख रुपयांची विविध कामे हाती घेण्यात आली आहेत. त्याचे सादरीकरण पुणे विभागीय आयुक्त सौरभ राव यांनी केले. या आराखड्यानुसार श्री विठ्ठल-रुक्मिणी मंदिराचे जतन आणि संवर्धन, पायाभूत सुविधा, गर्दी व्यवस्थापन, पर्यटक सुविधा नियोजन करण्यात येईल.

अक्कलकोटला ३६८ कोटींचा निधी

अक्कलकोट तीर्थक्षेत्र विकास आराखड्यांतर्गत ३६८ कोटी ७१ लाख रुपयांच्या आराखड्यामध्ये करण्यात येणाऱ्या कामांबाबत चर्चा झाली. वाहनतळ, रस्ता रुंदीकरणासाठी आवश्यक त्या भूसंपादनाला या वेळी मंजुरी देण्यात आली.

प्रस्तावित आराखड्यामध्ये वाहनतळ, वॉटर एटीएम, रस्ते विकास, शौचालय निर्मिती, हत्ती तलाव उद्यानांचा विकास, व्यापारी केंद्र, भक्त निवास, चौक सुशोभीकरण या कामांचा समावेश आहे.