Malegaon Sugar Factory Elecation: खरीप हंगाम तोंडावर आला आहे. त्यामुळे शेतकऱ्यांची लगबग सुरू झाली आहे. यावरूनच उपमुख्यमंत्री अजित पवारांनी गुरुवारी (ता.२२) खत लिकिंग करणाऱ्या विक्रेत्यांना तंबी दिली आहे. जर खत विक्रेत्यांनी लिकिंग केलं तर ताबडतोब विक्रेत्यावर अॅक्शन घेणार असल्याचा इशाराही अजित पवारांनी आहे.

अजित पवार म्हणाले, "खत लिकिंग करणाऱ्यांचं लायसन्स रद्द करणार आहे. माझ्या शेतकऱ्याला बळीजबरी करून कोणतंही खत गळ्यात मारायचं नाही. जे बियाणं चांगलं आहे, तेच शेतकऱ्यांना द्यायचं." अशी सूचना अजित पवार यांनी केली. माळेगाव सहकारी साखर कारखान्याच्या पार्श्वभूमीवर अजित पवारांनी बारामती येथे जाहीर मेळावा घेतला. यावेळी अजित पवारांनी खरीप हंगाम आढावा बैठकीबद्दल माहिती दिली.

शेतकरी सुपर फॉस्फेट घेत असेल किंवा डीएपी घेत असेल तर हे खत घेतलंच पाहिजे, असं शेतकऱ्यांना सांगत असाल तर कारवाई करण्याचा इशाराही अजित पवारांनी दिला. तसेच अवकाळी पावसामुळे कांद्याचं नुकसान झालं आहे, त्याचे पंचनामे करायला सांगितलं आहे. पण ऊस पिकाला फायदा झाल्याचं अजित पवार म्हणाले.

रस्ते करण्याची ग्वाही

माळेगाव सहकारी साखर कारखान्याच्या हद्दीतील रस्ते पुढील पाच वर्षात पूर्ण करण्याची घोषणा अजित पवारांनी केली. तसेच कारखान्याच्या सभासदांना कसलीही तोशीस करावी लागणार नाही, याची काळजी घेईल, असं आश्वासन अजित पवारांनी दिलं आहे. माझं ध्येय चांगलं आहे. मला कारखाना चांगला चालवायचा आहे. त्यामुळे सामावून घेण्याची आपली तयारी असल्याचं अजित पवार म्हणाले.