Farming Tips :

काजू

मोहोर अवस्था

काजूच्या नवीन येणाऱ्या पालवीवर ढेकण्या (टी मोस्कीटो बग) किडीचा प्रादुर्भाव दिसून येत आहे. ही कीड पालवीतील रस शोषून घेते. त्यामुळे नवीन पालवी सुकून जाते. असे असल्यास नियंत्रणासाठी विद्यापीठाच्या शिफारशीत काजू पालवी व मोहर संरक्षणाच्या सुधारित वेळापत्रकानुसारकाजू पालवी अवस्थेत असताना, लॅम्बडा सायहॅलोथ्रीन (५ टक्के प्रवाही) ६ मिलि, तर मोहोर अवस्थेत, प्रोफेनोफॉस (५० टक्के प्रवाही) १० मिलि फळधारणेच्या वेळी, लॅम्बडा सायहॅलोथ्रीन (५ टक्के प्रवाही) ६ मिलि प्रति १० लिटर पाणी या प्रमाणे फवारणी करावी.

फवारणी पानांच्या खालून आणि वरून व्यवस्थित बसेल अशी करावी. ढेकण्या कीड उन्ह तापू लागताच सक्रिय होतात. त्यामुळे ते एका जागी स्थिर राहत नसल्याने फवारणी द्रावणाचा संपर्क जास्त येत नाही. त्यामुळे अपेक्षित नियंत्रण होत नाही. त्यासाठी सकाळी १० पूर्वी किंवा संध्याकाळी ४ नंतर फवारणी करावी.

एकाच कीटकनाशकाची सलग फवारणी घेणे टाळावे. काजू बागेतील गवत काढून बागेची साफसफाई करावी. त्यानंतर रासायनिक कीटकनाशकाची फवारणी करावी. काजू बागेतील कलमांसोबतच इतर गावठी झाडांवर देखील फवारणी करावी. जेणेकरून किडींच्या प्रादुर्भावावर प्रभावी नियंत्रण मिळविणे शक्य होईल.

काजू पिकावर करपा रोगाचा प्रादुर्भाव दिसून येण्याची शक्यता आहे. करपा रोगामुळे पानांवर करड्या पिंगट रंगाचे अनियमित आकाराचे ठिपके दिसून येतात. रोगाची तीव्रता वाढल्यास संपूर्ण पान करपते आणि गळून पडते. नियंत्रणासाठी मॅन्कोझेब २० ग्रॅम प्रति १० लिटर पाणी या प्रमाणात फवारणी करावी. काजूचे अधिक उत्पादन मिळविण्याकरिता १९:१९:१९ या विद्राव्य अन्नद्रव्याची २० ग्रॅम प्रति लिटर पाणी या प्रमाणात मोहर आल्यानंतर फवारणी करावी.

वाल किंवा चवळी

शाकीय वाढ पिकामध्ये आवश्यकतेनुसार १५ ते २० दिवसांनी कोळपणी व बेणणी करावी. ढगाळ वातावरणामुळे कुळीथ पिकावर रस शोषणाऱ्या किडींचा प्रादुर्भाव होऊ शकतो. प्रादुर्भाव आढळून आल्यास, लॅम्बडा सायहॅलोथ्रिन (५ टक्के प्रवाही) ०.६ मिलि प्रति लिटर पाणी या प्रमाणात फवारणी घ्यावी.

मिरची

वाढीची अवस्था

ढगाळ वातावरणामुळे मिरची पिकावर फुलकिडींचा प्रादुर्भाव दिसून येण्याची शक्यता आहे. फुलकिडे पानांतील रस शोषून घेतात. त्यामुळे पाने सुरकुतून त्यांची वाढ खुंटते. नियंत्रणासाठी फिप्रोनील (५ टक्के प्रवाही) १.६ मिलि प्रति लिटर पाण्यात मिसळून फवारणी. फवारणी सकाळी किंवा संध्याकाळी पानांच्या दोन्ही बाजूस बसेल अशी करावी.

पिकामध्ये निळ्या रंगाचे चिकट कागदाचे सापळे लावावेत. हलके पाणी देत असलेल्या मिरची पिकामध्ये फुलकिडीच्या नियंत्रणासाठी व्हर्टिसिलियम लेकॅनी किंवा बिव्हेरिया बॅसियाना ५ ग्रॅम किंवा ५ मिलि प्रति लिटर पाण्यातून फवारणी करावी. रसशोषक किडींमुळे मिरची पिकावर चुरडा मुरडा रोगाचा प्रादुर्भाव दिसून येण्याची शक्यता असते. यासाठी विद्यापीठ शिफारशीनुसार सुरुवातीपासून ॲझाडिरॅक्टीन ३ मिलि प्रति लिटर पाण्यातून फवारणी करावी. रोगग्रस्त झाडे उपटून नष्ट करावीत.

पांढरा कांदा

वाढीची अवस्था

पुनर्लागवडीयोग्य कांदा पिकाची रोपे लागवड करून घ्यावी. लागवड गादीवाफ्यांवर किंवा सरी वरंब्यावर ३० बाय १० सेंमी अंतरावर करावी. पूर्वमशागतीवेळी २५० ते ३०० किलो शेणखत किंवा कंपोस्ट खत किंवा गांडूळखत प्रति गुंठा मात्रा जमिनीत मिसळावीत.

लागवडीवेळी १ किलो युरिया, ३ किलो सिंगल सुपर फॉस्फेट आणि ८०० ग्रॅम म्युरेट ऑफ पोटॅश प्रति गुंठा प्रमाणे मात्रा द्यावी. मर रोगापासून रोपांचे संरक्षण करण्यासाठी पुनर्लागवडीवेळी रोपे ट्रायकोडर्मा ५ ग्रॅम प्रति लिटर पाण्याच्या द्रावणात ५ मिनिटे बुडवून नंतर लागवड करावी.

(टीप : कीडनाशक फवारणीच्या मात्रा हाय व्हॉल्यूम पंपासाठीच्या आहेत.)

८१४९४६७४०१

(कृषी विद्या विभाग आणि ग्रामीण कृषी मौसम सेवा, डॉ. बाळासाहेब सावंत कोकण

कृषी विद्यापीठ, दापोली)