Nashik News : शेतीमालाला योग्य भाव मिळण्यासाठी राज्यात कृषी विभागाच्या जागेवर शॉपिंग मॉल्स उभारून शेतकरी ते ग्राहक अशी हक्काची बाजारपेठ उपलब्ध करून देण्यासाठी शासन स्तरावर प्रयत्न सुरू असल्याचे कृषिमंत्री ॲड. माणिकराव कोकाटे यांनी सांगितले.

चांदवड तालुक्यातील धोडंबे येथे विविध कार्यकारी सेवा सहकारी संस्था कार्यालयाचे उद्घाटन व वैकुंठरथ लोकार्पणप्रसंगी मंत्री ॲड.कोकाटे बोलत होते. या वेळी खासदार भास्कर भगरे, आमदार डॉ. राहुल आहेर, माजी आमदार शिरीषकुमार कोतवाल, जिल्हा उपनिबंधक फय्याज मुलाणी, सरपंच मेघना रकिबे, संस्थेचे चेअरमन तथा सभापती नितीन उशीर,संचालक दिलीपकुमार केदार, उपसभापती केदू रकिबे, सचिव अरुण जाधव यांच्यासह संचालक मंडळ व ग्रामस्थ उपस्थित होते.

कोकाटे म्हणाले, की शेतकऱ्यांसाठी नाशिक जिल्हा मध्यवर्ती सहकारी बँकेला ऊर्जितावस्तेत आणण्यासाठी शासनस्तरावर सर्वतोपरी प्रयत्न सुरू आहेत. येणाऱ्या काळात शेतकऱ्यांना अधिक सक्षम करण्याच्या दृष्टीने केंद्र व राज्य शासनाच्या माध्यमातून अनेक नवीन कृषी योजना आखण्यात येत आहे.

या वेळी खासदार भास्कर भगरे व आमदार डॉ. राहुल आहेर यांनी मनोगत व्यक्त केले. प्रास्ताविक चेअरमन उशीर यांनी केले. सुरुवातीला मंत्री ॲड.कोकाटे यांच्या हस्ते येथे विविध कार्यकारी सेवा सहकारी संस्था कार्यालयाचे फीत कापून उद्घाटन करण्यात आले.

धोडंबे सहकारी संस्थेचे कार्य उल्लेखनीय

धोडंबे सहकारी संस्था आर्थिकदृष्ट्या सक्षम असून, संस्थेचे कार्य उल्लेखनीय आहे. संस्थेचा आर्थिक लेखाजोखा पाहता या संस्थेच्या रुपये ८५ लाख रकमेच्या ठेवी व रुपये २२ लाख रकमेचा इमारत निधी बँकेत जमा आहे. तसेच संस्थेमार्फत शेतकऱ्यांना देण्यात आलेल्या कर्जाची नियमित परतफेड होत असल्याने संस्थेची आर्थिक बाजू भक्कम असल्याचे मंत्री ॲड. कोकाटे यांनी सांगितले.