Nanded News : प्रधानमंत्री पिक विमा योजनेअंतर्गत नांदेड जिल्ह्यातील सर्वच ९६ महसूल मंडळामध्ये सोयबीन पिकासाठी हंगामातील प्रतिकूल परिस्थिती (मिड सिझन अँडव्हर्सिटी) जिल्हाधिकारी अभिजित राऊत यांनी मंजूर केली होती. या घटकानुसार जिल्ह्यात आतापर्यंत २१४ कोटी ६२ लाख रुपयांच्या अग्रिम विमा वाटप झाल्याची माहिती कृषी विभागाच्या सूत्राने दिली.

नांदेड जिल्ह्यात जुलैमध्ये झालेली अतिवृष्टी तसेच ऑगस्टमधील पावसाची अनियमितता यामुळे खरिपातील पिकांचे ५० टक्के पेक्षा जास्त नुकसान झाले होते. अशावेळी जिल्ह्यातील पीक विमाधारक शेतकऱ्यांना पीक नुकसानीच्या २५ टक्के अग्रिम रक्कम मिळावी, यासाठी जिल्हा प्रशासनास अधिसूचना काढण्याबाबत सूचना शासनाकडून दिल्या होत्या.

यानुसार नांदेड जिल्ह्यात २८५ कोटींचा अग्रिम विमा मंजूर झाला आहे, त्यापैकी आता पर्यंत २१४ कोटी ६२ लाखांपेक्षा अधीकची रक्कम शेतकऱ्यांच्या खात्यावर जमा करण्यात आली आहे, उर्वरित रक्कमही लवकरच जमा होणार असल्याची माहिती विमा कंपनी दिली आहे.

परतावा मिळण्यास विलंब

अग्रिम पीकविमा वाटपाचे काम पंधरा दिवसापूर्वी सुरु करण्यात आले. परंतु या कामात गती नसल्यामुळे अनेक शेतकऱ्यांना याबाबत प्रतिक्षा करावी लागत आहे. शासनाकडून तर दिवाळीत अग्रिम वाटपाचे नियोजन होते.

परंतु नांदेडला मात्र विमा कंपनीकडून मंजुरी मिळाल्यानंतर शेतकऱ्यांच्या खात्यात पडण्यास नवीन वर्षाचा वाट पहावी लागली. आतातरी शेतकऱ्यांना लवकर विमा मिळावा, अशी अपेक्षा सर्व शेतकरी करता आहेत.