Kolhapur News : ऊस उत्पादक शेतकऱ्यांना ठरल्याप्रमाणे १०० व ५० रुपयांचा दुसरा हप्ता मिळावा तसेच शक्तिपीठ महामार्ग रद्द व्हावा. यासाठी शाहू महाराजांच्या जयंतीनिमित्त बुधवारी (ता. २६) कागल ते कोल्हापूर पायी कैफियत पदयात्रा काढण्यात आली.

या वेळी माजी खासदार राजू शेट्टी म्हणाले, की सरकारने शेतकऱ्यांना दिलेला शब्द पाळलेला नाही. सध्या जाहीर केलेला हमीभाव ही केवळ तडजोड आहे. सबसिडी देऊन भाव नियंत्रित करत असल्यामुळे शेतकरी देशोधडीला लागलेला आहे.

सरकारने शेतकरी हिताचे निर्णय घ्यावेत यासाठी ही कैफियत यात्रा काढली असल्याचे त्यांनी सांगितले. मागील वर्षी तुटलेल्या उसाची एफआरपी अधिक १०० रुपये मिळावेत अशी आमची मागणी होती. त्यासाठी आम्ही शेतकऱ्यांनी महामार्ग रोखला.

ज्या कारखान्याने तीन हजार रुपये दिले त्यांनी जादा पन्नास रुपये शेतकऱ्यांना द्यायचे अशी मागणी ठरली होती. त्या वेळी हा प्रस्ताव मांडण्यात आला होता. तो जिल्हाधिकाऱ्यांच्या मध्यस्थीने मिटवण्यात आला होता. परंतु राज्य सरकारने याला परवानगी न दिल्याने शेतकऱ्यांना पैसे मिळाले नाहीत.

या वेळी राजू शेट्टी यांनी जुलैपासून शेतकरी कर्ज मुक्ती आंदोलन करणार असून, त्यासाठी राज्याचा दौरा करणार असल्याचे सांगितले.