Gondia News : गोंदिया जिल्ह्यातील चुटिया येथील श्रीराम अभिनव सहकारी संस्थेने खरीप व रब्बी हंगामात खरेदी केलेला धान फेडरेशनकडे जमा केला नाही. परिणामी, या केंद्रावर हमीभावाने धान विकणाऱ्या शेतकऱ्यांचे चुकारे थकल्याने त्यांची आर्थिक अडचण होत आहे.

तब्बल ५ कोटी ७६ लाख रुपयांची अफरातफर या संस्था संचालकांनी केल्याचा आरोप आहे. फेडरेशनने संस्थेच्या ११ संचालकांसह चार कर्मचारी अशा एकूण १५ जणांविरोधात फसवणुकीचा गुन्हा दाखल केला आहे.

जिल्हा मार्केटिंग फेडरेशन आणि आदिवासी विकास महामंडळाच्या वतीने शासकीय धान खरेदी केंद्रावर हमीभावाने धान खरेदी केली जाते. सहकारी संस्था कमिशन तत्त्वावर शासकीय धान खरेदी करतात. शासकीय धान खरेदी केंद्रावर जमा असलेला हा धान फेडरेशनकडे जमा करावा लागतो, ही प्रक्रिया अनिवार्य आहे.

पण चुटिया येथील श्रीराम अभिनव सहकारी संस्थेने गेल्या खरीप हंगामात खरेदी केलेला १२ हजार क्‍विंटल व रब्बी हंगामातील १५ हजार ९९६ क्‍विंटल असा २८ हजर क्‍विंटल धान जमाच केला नाही.

जिल्हा मार्केटिंग फेडरेशनच्या यंत्रणेने गोदामाची तपासणी करून या संस्थेला धान जमा करण्यासाठी नोटीस बजावली. पण या संस्थेने धानाची परस्पर विक्री केल्याने फेडरेशनने संस्थेच्या ११ संचालकांसह चार कर्मचारी अशा एूण १५ जणांविरोधात गुन्हा दाखल केला आहे.

पाचशे शेतकरी अडचणीत

पोलिसांत गुन्हा दाखल केला असला तरी या संस्थेला धान विकणारे ५०० शेतकरी अडचणीत आले आहेत. या धान खरेदी प्रकरणात ५ कोटी ७६ लाख रुपयांची अफरातफर झाल्याचा आरोप आहे. गुन्हा दाखल झाल्यापासून संचालक व कर्मचारी फरार झाले आहेत.