Buldhana News: जिल्ह्यातील नागरिकांना आधार नोंदणी व अद्ययावत सेवा सुलभपणे मिळाव्यात, यासाठी जिल्ह्यातील ४४ महसूल मंडळे आणि बुलडाणा शहर येथे एकूण ४५ नवीन आधार सेवा केंद्रे सुरू होणार आहेत. या केंद्रांसाठी आपले सरकार सेवा केंद्र चालकांकडून अर्ज मागविण्यात आले असून, इच्छुकांनी १३ ऑगस्ट २०२५ पर्यंत अर्ज सादर करण्याचे आवाहन जिल्हाधिकारी डॉ. किरण पाटील यांनी केले आहे.

या प्रक्रियेसाठी संबंधित जाहिरात, नमुना अर्ज, अटी व शर्ती, पात्र/अपात्र उमेदवारांची यादी आणि निवड प्रक्रियेची सविस्तर माहिती जिल्हाधिकारी कार्यालयाच्या नोटीस बोर्डवर तसेच www.buldhana.nic.in या संकेतस्थळावर उपलब्ध आहे. अर्ज सादर करण्याच्या प्रक्रियेला शनिवार (ता.३०) पासून सुरुवात झाली आहे. कार्यालयीन वेळेत जिल्हाधिकारी कार्यालयातील सेतू विभागात अर्ज सादर करावा. 

आधार कार्ड, पॅन कार्ड, किमान बारावी उत्तीर्ण प्रमाणपत्र,  MS-CIT किंवा समकक्ष संगणक प्रमाणपत्र, केंद्र चालवण्याचा अनुभव असल्यास त्याचे प्रमाणपत्र, संबंधित महसूल मंडळातील रहिवासी असल्याचे प्रमाणपत्र, NSEIT सुपरवायझर प्रमाणपत्र (अनिवार्य), आपले सरकार सेवा केंद्र आधीपासून चालू असलेले असावे, असे आवाहन करण्यात आले आहे.

तालुकानिहाय केंद्रे

बुलडाणा ३, चिखली ६, देऊळगाव राजा ३, मेहकर ५, लोणार ३, सिंदखेडराजा ३, मलकापूर ३, मोताळा ४, नांदुरा २, खामगाव  ७, शेगाव ३, जळगाव जामोद २, संग्रामपूर १.

महत्त्वाच्या अटी व सूचना 

आधार ऑपरेटरसाठी १ वर्षाचा करारनामा बंधनकारक

आधार किट मंजुरीनंतर ५०,००० रुपयांची बँक गॅरंटी (FD स्वरूपात) आवश्यक

एकाच अर्जदाराकडून एकच अर्ज ग्राह्य धरला जाईल

कुटुंबातील इतर सदस्यांनी अर्ज केल्यास दोन्ही अर्ज बाद, 

यापूर्वी आधार केंद्र चालवणारे किंवा त्यांच्या कुटुंबातील सदस्य अपात्र

मंजूर केंद्र निर्धारित महसूल मंडळातच सुरू करणे अनिवार्य

केंद्र हस्तांतरण अथवा जादा शुल्क आकारणे व नियमभंग केल्यास फौजदारी गुन्हा दाखल होणार

निवड प्रक्रिया पारदर्शक, एकापेक्षा जास्त पात्र अर्ज आल्यास ''ईश्वर चिठ्ठी'' पद्धतीने निवड

अंतिम निर्णय जिल्हाधिकारी तथा जिल्हास्तरीय आधार नियंत्रण समितीकडे राखीव