Nashik News : सततचा पाऊस आणि गोदावरी डावा कालवा, मराठवाडा एक्स्प्रेस कालवा हे सलग ४५ दिवस सुरू राहिल्याने निफाड तालुक्यातील खेडलेझुंगे, कोळगाव, रुई, कानळद, देवगाव, शिवारातील शेतजमिनी नापिक झाल्या आहेत.

त्यामुळे शेतकऱ्यांचे मोठे नुकसान झाल्याने या भागाचा पंचनामा करून नुकसानभरपाई देण्याची मागणी स्वाभिमानी शेतकरी संघटनेच्या शिष्टमंडळाने निवेदनाद्वारे तहसीलदारांकडे केली आहे.

मे व जूनच्या पावसामुळे व या गावांलगत असलेले गोदावरी डावा व मराठवाडा एक्स्प्रेस हे दोन्हीही कालवे सलग ४५ दिवस सुरू राहिल्याने पाणीगळती होऊन भूजल पातळी अधिक झाल्याने या जमिनी नापिक झाल्या आहेत. पाटबंधारे व जलनिस्सारण विभागाच्या निष्काळजीपणामुळे कालव्यातील पाण्याच्या गळतीमुळे शेतजमिनी नापिक झालेल्या आहेत.

पाटबंधारे विभागाने या कालव्यांच्या पाण्याच्या गळतीबाबत कुठल्याही प्रकारचे नियोजन तसेच उपाययोजना केलेली नाही, त्यामुळे परिसरातील वर नमूद गावांच्या शिवारातील शेतकऱ्यांना खरिपाची पेरणी करणे अशक्य झालेले आहे.

तसेच पेरणी केलेल्या शेतकऱ्यांच्या पिकाचेदेखील या पाण्यामुळे नुकसान झाले आहे. पेरणी लांबणीवर पडलेली आहे. त्यामुळे परिसरातील शेतकऱ्यांना पेरणी होईल याची शाश्वती नाही. परिसरातील हजारो हेक्टर शेती नापिक झालेली असून, यास पाटबंधारे विभाग जबाबदार असून, नापिक जमिनींचे पंचनामे करून त्यांना हेक्टरी दोन लाख रुपये याप्रमाणे नुकसानभरपाई द्यावी, तसेच या समस्येवर कायमस्वरूपी उपाययोजना कराव्यात याकरिता संबंधित विभागांना आदेश देण्यात यावेत, असेही निवेदनात म्हटले आहे.

कार्यवाही न झाल्यास तीव्र आंदोलन

निवेदनानंतर कार्यवाही न झाल्यास पाटबंधारे विभागाविरोधात तीव्र आंदोलन करण्यात येईल. निवेदनावर स्वाभिमानी शेतकरी संघटनेचे जिल्हाध्यक्ष निवृत्ती गारे, गजानन घोटेकर, अनिल घोटेकर, धर्मराज घोटेकर, केदारनाथ घोटेकर, रवींद्र घोटेकर, विनायक वाघ, संतोष घोटेकर यांच्या स्वाक्षऱ्या आहेत.