Solapur News : सोलापूर जिल्ह्यात ऊस गाळप हंगामाला वेग आला असून, यंदा जिल्ह्यातील ३४ कारखान्यांपैकी ९ साखर कारखान्यांमध्ये प्रत्यक्ष गाळपाला सुरवात झाली आहे. या कारखान्यात आतापर्यंत जवळपास ३ लाख ४४ हजार ४८६ टन उसाचे गाळप झाले आहे.

जिल्ह्यात विधानसभा निवडणुकीमुळे गाळपावर काहीसा परिणाम झाला होता. जिल्ह्यातील सहा साखर कारखानदार आणि कारखान्यांच्या यंत्रणा निवडणुकीत गुंतल्याने गाळपाला काहीशी संथगती आली होती.

पण आता गेल्या दोन दिवसांपासून गाळपाने वेग घेतला आहे. जिल्ह्यात सध्या आष्टी (ता.मोहोळ) येथील आष्टी शुगर, आलेगाव (ता.माढा) येथील भैरवनाथ शुगर वर्क्स, खामगाव (ता.बार्शी) येथील येडेश्वरी अॅग्रो प्रॉडक्ट, तिऱ्हे (ता.उत्तर सोलापूर) येथील सिद्धनाथ शुगर, माळीनगर (ता.माळशिरस) येथील सासवड माळी शुगर,

श्रीपूर (ता.माळशिरस) येथील श्री सुधाकरपंत परिचारक पांडुरंग साखर कारखाना, सदाशिवनगर (ता.माळशिरस) येथील शंकर सहकारी साखर कारखाना आणि अकलूज येथील सहकारमहर्षी शंकरराव मोहित पाटील साखर कारखाना अशा ९ कारखान्यांत गाळप सुरू आहे.

जिल्ह्याचा साखरेचा सरासरी उतारा ७.३ टक्के आला आहे. जिल्ह्यात या कारखान्यात आतापर्यंत ३ लाख ४४ हजार ४८६ टन उसाचे गाळप झाले असून, २ लाख ४९ हजार २५० क्विंटल साखरेचे उत्पादन झाले आहे. यंदा साधारण १०० ते १२० दिवस हंगाम चालेल, असेही सांगण्यात आले.