Dhule News : येथील अवधान शिवारातील एमआयडीसीच्या (MIDC) प्रादेशिक कार्यालयाच्या नवीन इमारतीसाठी २१ कोटी, तसेच अग्निशमन यंत्रणा, रूग्णवाहिकेसाठी (Ambulance) आणखी १३ कोटींचा भरीव निधी शासनाकडून मंजूर झाल्याची माहिती शहराचे आमदार फारूक शाह (MLA Farooq Shah) यांनी दिली.

ते म्हणाले, एमआयडीसीच्या येथील प्रादेशिक कार्यालयासाठी २१ कोटी, तसेच फायर स्टेशनसाठी साडेसहा कोटींचा निधी नाशिक विभागीय आढावा बैठकीवेळी मागितला होता. त्याची मुख्यमंत्री एकनाथ शिंदे यांनी दखल घेतली होती.

यात एमआयडीसीसाठी धुळे शहरालगत रावेर येथील सुमारे ९८ हेक्टर अतिरिक्त जमीन तत्काळ अधिग्रहीत करण्याचे मुख्यमंत्र्यांनी जाहीर केले होते. त्यासाठी पाठपुरावा सुरू होता.

तत्पूर्वी, वनमंत्र्यांच्या दालनातही झालेल्या बैठकीत या जमीन अधिग्रहणाचा मुद्दा रेटून नेला होता. त्यामुळे मुख्यमंत्र्यांनी जमीन अधिग्रहण करण्याचे जाहीर करत विकासाचा मुद्दा सोडविला होता.

एमआयडीसीचे खानदेशसाठी स्वतंत्र प्रादेशिक कार्यालय धुळे एमआयडीसीत आहे. या वास्तूत तीन जिल्ह्यांचा कार्यभार सांभाळला जात असताना सुटसुटीत काम करण्यास अडचण येत आहेत.

त्यामुळे स्वतंत्र व सुसज्ज प्रादेशित कार्यालयाच्या नवीन इमारतीसाठी निधीची मागणी केली. यानंतर उद्योगमंत्री उदय सामंत यांना तत्काळ निर्णय घेत एमआयडीसी प्रादेशिक कार्यालयासाठी २१ कोटी, तसेच फायर स्टेशन इमारत, दोन अग्निशमन बंब आणि रुग्णवाहिकेसाठी १३ कोटींचा निधी मंजुर केला आहे, असे आमदार शाह यांनी सांगितले.