Parbhani News : राष्ट्रीय कृषी विकास योजना (आरकेव्हिवाय) अंतर्गत वसंतराव नाईक मराठवाडा कृषी विद्यापीठाला ४ नवीन संशोधन प्रकल्प मंजूर करण्यात आले आहेत. या प्रकल्पांसाठी एकूण २१ कोटी रुपयांवर निधी मंजूर केला आहे.

या प्रकल्पांत शेतकरी सहभागातून शाश्वत व नैसर्गिक शेतीसाठी सूक्ष्मजीव तसेच यांत्रिक उपाययोजना संशोधन प्रकल्प, उती तपासणीव्दारे पिकांमधील पोषणमूल्य कमतरता निदान, प्रगत वनस्पती विश्लेषण प्रयोगशाळा, लिंबूवर्गीय पिकांच्या शाश्वत विकासासह हरित व्यवस्थापन कृती कार्यक्रम, नैसर्गिक व सेंद्रिय शेतीला प्रोत्साहनासाठी कीटकनाशकांचे अवशेष विश्लेषण प्रयोगशाळा यांचा समावेश आहे.

गुरुवार (ता.२२) ते सोमवार (ता.२६) या कालावधीत काढलेल्या शासन निर्णयाव्दारे निधी खर्चास मंजुरी देण्यात आली. शेतकरी सहभागातून नैसर्गिक शेतीसाठी सूक्ष्मजीव आणि यांत्रिक उपाययोजना हा संशोधन प्रकल्प परभणी येथे राबविण्यास प्रशासकीय मान्यता देण्यात आली आहे. त्यासाठी ३ कोटी १५ लाख ५१ हजार रुपये निधीस मंजुरी दिली आहे.

उती तपासणीव्दारे पिकांमधील पोषणमूल्य कमतरता निदान प्रगत वनस्पती विश्लेषण प्रयोगशाळा परभणी, गोळेगाव (जि. हिंगोली), नांदेड, लातूर, धाराशिव, अंबाजोगाई (जि. बीड), बदनापूर (जि. जालना), छत्रपती संभाजीनगर येथे स्थापन करण्यास ४ कोटी २८ लाख ८४ हजार रुपये निधी मंजूर केला आहे