Yavatmal News : दिग्रस तालुक्‍यात पीकविमा भरपाईचा गुंता कायम आहे. तालुक्‍यात ३७ हजार ३९ शेतकऱ्यांनी विमा भरपाईबाबत पूर्वसूचना दिली. त्यानंतर देखील केवळ १७ हजार ३६१ शेतकऱ्यांच्या खात्यावरच भरपाई जमा करण्यात आली असून, तब्बल १८ हजार ४३३ शेतकरी अद्यापही भरपाईपासून वंचित आहेत.

यवतमाळ जिल्ह्यातील शेतकऱ्यांना यंदाच्या खरिपात अनेक संकटांचा सामना करावा लागला. सुरुवातीला पावसाचा खंड, त्यानंतर मुसळधार पाऊस आणि परत खंड अशी स्थिती जिल्ह्यात होती. त्याची दखल घेत प्रशासनाकडून नुकसान सर्वेक्षण, पंचनामे करण्यात आले. मात्र शासनाकडून भरपाईपोटी छदामही जमा करण्यात आला नाही.

परिणामी विमा भरपाई मिळेल, अशी अपेक्षा शेतकऱ्यांना होती. मात्र विमा कंपनीने देखील शेतकऱ्यांची पुरती निराशा केली आहे. यंदाच्या हंगामात एक रुपयात विमा असल्याने शेतकऱ्यांचा याला भरभरून प्रतिसाद मिळाला. त्यानंतर मात्र भरपाईपोटी एक ते दोन रुपये खात्यात जमा झाल्याने शेतकऱ्यांचा पुरता भ्रमनिरास झाला.

या कारणामुळे शेतकऱ्यांमध्ये तीव्र असंतोष असतानाच पूर्वसूचना देणाऱ्या शेतकऱ्यांना भरपाईपासून वंचित ठेवण्यात आल्याने या असंतोषात आणखी भर पडली आहे. दिग्रस तालुक्‍यात ४२ हजार १०० शेतकऱ्यांनी पीकविमा काढला होता. त्यातील ३७ हजार ३९ शेतकऱ्यांनी ७२ तासांत कंपनीला नुकसानीबाबत माहिती दिली.

यातील केवळ १७ हजार ३६१ शेतकऱ्यांच्या खात्यातच विमा रक्‍कम जमा करण्यात आली आहे. उर्वरित १२४५ शेतकऱ्यांचे ‘अकाउंट नॉट व्हेरीफाय’ असे सांगत त्यांना क्‍लेम देण्यास विलंब होत आहे. १८ हजार ४३३ शेतकरी विमा भरपाईपासून वंचित आहेत.