Crop Damage Compensation : भरपाई न मिळाल्यास रस्त्यावर उतरू

Wardha News : देवळी तालुक्‍यात मॉन्सूनोत्तर पावसामुळे शेतीपिकाचे नुकसान झाले. त्याची दखल घेत शेतकऱ्यांना पिकविम्यासह शासनाकडून अनुदानस्वरूपात भरपाई मिळावी, अशी मागणी शेतकरी संघटनेने केली आहे. मागणीची दखल न घेतल्यास तीव्र आंदोलनाचा इशाराही देण्यात आला आहे.

खरीप हंगामातील कापूस, तूर अशी पिके शिवारात उभी आहेत. मजुरांच्या उपलब्धतेअभावी कापूस वेचणीला ब्रेक लागला आहे. अशातच आलेल्या पावसामुळे बोंडातील कापूस भिजत कापसाचा दर्जा खालावला. बाजारात कापसाला आधीच दर कमी आहेत. अशातच आता कापसाची प्रत खालावल्याने हे दर आणखी कमी होतील.

फुलोऱ्यावर तर काही ठिकाणी शेंगा भरण्याच्या अवस्थेत तूर आहे. पावसामुळे तुरीचा फुलोरा गळून पडला तर काही ठिकाणी तुरीचे पीक आडवे झाल्याने त्याचाही परिणाम उत्पादकतेवर होणार आहे. रबी हंगामात काही शेतकऱ्यांनी हरभऱ्याची लागवड केली होती. पावसाचा फटका बसल्याने हरभरा उत्पादकही हवालदील झाले आहेत.

या साऱ्याची दखल घेत सर्व्हेक्षण, पंचनाम्याच्या कामाला गती मिळावी. त्याआधारे भरपाईचा प्रस्ताव शासनाला पाठविण्यात यावा, विमा भरपाईबाबत सध्या कोणत्याच हालचाली नाहीत. विमा कंपनीकडून भरपाईस टाळाटाळ होत असल्याने शेतकऱ्यांमध्ये रोष आहे.

विमा भरपाई खात्यात जमा करून शेतकऱ्यांना दिलासा देत त्यांचा रोष कमी करावा, अशा मागण्या देवळी तहसीलदारांना दिलेल्या निवेदनातून करण्यात आल्या आहेत. मागण्यांची दखल न घेतल्यास तीव्र आंदोलन छेडण्याचा इशाराही दिला आहे. शेतकरी संघटनेचे माजी युवा आघाडी अध्यक्ष सतीश दाणी, चंदू भोयर, शैलेश डफरे, महेश कचोळे, पद्माकर राऊत यांनी हे निवेदन दिले.