Latur News : जिल्ह्यात मेमध्ये झालेल्या अवकाळी पावसाचा १३ हजार ६९० शेतकऱ्यांना फटका बसला असून या शेतकऱ्यांच्या तब्बल सहा हजार ३१२ हेक्टर क्षेत्रावरील पिके व फळबागा बाधित झाल्या आहेत. यात सहा हजार ९० हेक्टरवरील रब्बी पिके व भाजीपाला पिके तर २२१ हेक्टवरील फळबागांचा समावेश आहे.

बाधित क्षेत्रावरील ३३ टक्क्यांपेक्षा जास्त नुकसान झाल्याने राज्य आपत्ती प्रतिसाद दलाच्या (एसडीआरएफ) नियमानुसार या शेतकऱ्यांना १७ कोटी २४ लाख २२ हजार ९० रुपये नुकसान भरपाई देण्यासाठी जिल्हा प्रशासनाने राज्य सरकारकडे निधीची मागणी केली आहे.

मे महिन्यातील अवकाळी पावसाने फळपिकांसोबत बागायती क्षेत्रावरील पिकेही आडवी झाली होती. सततच्या पावसामुळे सहा हजार ९० हेक्टवरील रब्बी ज्वारी, गहू, भूईमुगासह भाजीपाला पिकांचे नुकसान झाले. यासोबत फळबागांनाही या पावसाचा मोठा फटका बसला. यात २२१ हेक्टवरील केळी, द्राक्ष, पपई, डाळिंब, मोसंबी, आंबा, चिकू, संत्रा व अन्य फळांचे नुकसान झाले.

या नुकसानीचे पंचनामे करण्याचे आदेश सरकारने दिले होते. त्यानुसार महसूल व कृषी विभागाने पंचनामे करुन नुकसानीचा अहवाल सादर केला होता. यात तीन हेक्टरपर्यंतची नुकसान भरपाई मिळत असली तरी सर्वच शेतकऱ्यांचे दोन हेक्टरपर्यंतच नुकसान झाले आहे. त्यानुसार भरपाई देण्यासाठी निधीची मागणी करण्यात आली आहे.

पावसामुळे लातूर तालुक्यातील एका गावात जमिनीचेही नुकसान झाले असून त्याच्या भरपाईसाठी २५ हजार ८५० रुपये निधीची मागणी प्रशासनाने केली आहे. सर्वाधिक सतराशे हेक्टरवरील पिके व फळबागांचे नुकसान अहमदपूर तालुक्यात झाले असून या तालुक्यातील शेतकऱ्यांना चार कोटी ६२ लाखाची भरपाई मिळण्याची शक्यता आहे.

त्यानंतर उदगीर तालुक्यातील बाराशे हेक्टर, औसा तालुक्यातील ७१० हेक्टर, निलंगा तालुक्यातील ६७९ हेक्टरवरील पिके व फळबागांना अवकाळी पावसाची बाधा झाली आहे.