जालना : पडणाऱ्या पावसाचा (Rain Data) हिशेब ठेवण्यासाठी गाव पातळीवर पाण्याचा ताळेबंद (Water Management) ठेवणे आवश्यक असल्याचे प्रतिपादन शिवणी (ता. जालना) येथील केंद्र शासन पुरस्कार प्राप्त प्रगतिशील शेतकरी कृषिभूषण उद्धवराव खेडेकर यांनी वानडगाव (ता. जालना) येथे केले.

खरपुडी येथील कृषी विज्ञान केंद्राच्यावतीने ‘‘जलशक्ती अभियान - कॅच दी रेन’’ अंतर्गत वानडगाव येथे शुक्रवारी (ता. ११) आयोजित शेतकरी प्रशिक्षण व जनजागृती कार्यक्रमात प्रमुख अतिथी म्हणून बोलत होते.

या कार्यक्रमाच्या अध्यक्षस्थानी कृषी विज्ञान केंद्राचे वरिष्ठ शास्त्रज्ञ व प्रमुख डॉ. एस. व्ही. सोनुने यांच्यासह वानडगावचे सरपंच नामदेव नागवे, कृषी अभियंता पंडित वासरे, पीक संरक्षण तज्ञ अजय मिटकरी, कृषी विभागाचे कृषी पर्यवेक्षक सुधाकर ढगे यांची प्रमुख उपस्थिती होती.

खेडेकर म्हणाले, की पडणाऱ्या पावसाचा प्रत्येक थेंब जमिनीत जिरविण्यासाठी शेतकऱ्यांनी जमिनीतील सेंद्रिय कर्ब वाढवून आपली जमीन समृद्ध करावी. पाऊस मोजण्यासाठी गावात पर्जन्यमापक यंत्र असावे व वर्षभर पडणाऱ्या पावसाचा हिशेब ठेऊन पाण्याच्या ताळेबंदानुसार पीक नियोजन करावे असे ते म्हणाले. .

डॉ. एस. व्ही. सोनुने यांनी अध्यक्षीय मार्गदर्शन करताना मुलस्थानी जलसंधारण आणि जल संधारणाच्या कृषी शास्त्रीय पद्धतीबाबत मार्गदर्शन केले. कृषी विज्ञान केंद्राच्या विविध उपक्रमांचा लाभ घ्यावा असे आवाहन त्यांनी केले. कृषी अभियंता पंडित वासरे यांनी कार्यक्रमाचे प्रास्ताविक करून एकात्मिक पाणलोट क्षेत्र विकास जलसंधारण या विषयावर सविस्तर मार्गदर्शन केले. अजय मिटकरी यांनी तूर पिकातील एकात्मिक कीड व्यवस्थापन या विषयावर शेतकऱ्यांना मार्गदर्शन केले. आभार प्रदर्शन सलमान पठाण यांनी केले.