VSI In Nagpur विदर्भात ऊस लागवड (Sugarcane Cultivation) क्षेत्र वाढत असतानाच या पिकातील व्यवस्थापन आणि संशोधनाला चालना मिळावी, यासाठी वसंतदादा शुगर इन्स्टिट्यूटचे (Vasantdada Sugar Institute) उपकेंद्र स्थापन करण्याच्या कामाला गती देण्यात आली आहे.

गोपाळपूर भागात तब्बल २०० एकरांवर त्याची उभारणी होणार आहे. पहिल्या टप्प्यात ७२ एकर जागेची खरेदी करण्यात आली आहे. ऑगस्ट महिन्यात या क्षेत्रावर लागवडीचे नियोजन आहे.

पारंपरिक पिकांऐवजी ऊस पीक आर्थिक संपन्नता देणारे आहे. याच कारणामुळे केंद्रीय मंत्री नितीन गडकरी यांनी या भागात ऊस लागवडीला प्रोत्साहन देण्यासाठी पुढाकार घेतला आहे. सद्यःस्थितीत नागपूर विभागात तीन कारखान्यांचे व्यवस्थापन त्यांच्याद्वारे होते. तर २५ हजार एकरांची लागवड आहे.

मात्र या पिकाचे व्यवस्थापन तांत्रिक पद्धतीने होत नसल्याने उत्पादकता कमी आहे. डॉ. पंजाबराव देशमुख कृषी विद्यापीठाचे ऊस संशोधन केंद्र तारसा येथे आहे. परंतु या केंद्राच्या नावे एकही उपलब्धी नाही. त्यामुळे गडकरी यांनी ‘व्हीएसआय’चे अध्यक्ष शरद पवार यांच्याकडे ‘व्हीएसआय’चे उपकेंद्र उभारावे, अशी मागणी केली. त्यास श्री. पवार यांनी मान्यता दिली.

सध्या उपलब्ध जमिनीच्या विकासाचे काम हाती घेतले आहे. मोजणी आणि कंपाउंड, नांगरट, प्लॉट पाडणे, पाइपलाइन, वॉटर टॅंक उभारणे अशी कामे पहिल्या टप्प्यात होतील. त्यानंतर ऑगस्टमध्ये लागवड करून पुढील वर्षी या भागातील शेतकऱ्यांना सुधारित जातीचे बेणे देण्याचे प्रस्तावित आहे.

या भागात येणारे वाण देत त्या माध्यमातून ऊस उत्पादकता कशी वाढवायची याविषयीचे तंत्रज्ञानही पुरविले जाईल. नागपुरातील या केंद्राचे प्रमुख म्हणून डी. एस. पवार यांची नियुक्‍ती केली आहे. दोन सहायकही येथे आहेत.