नांदेड : ‘भाऊराव’, ‘पूर्णा’, ‘टोकाई’, ‘कुंटूरकर शुगर’सह नांदेड विभागातील बहुतांश कारखान्यांनी (Sugar Mill) शेतकऱ्यांना एफआरपी रक्कम दिली नाही. आजघडीला नांदेड विभागातील साखर कारखानदारांकडे (Sugar Loan) दीडशे कोटी रुपयांचे शेतकऱ्यांचे देणे बाकी आहे.

त्यामुळे या सर्व कारखान्यांना विलंब व्याज आकारणी सुरू करावी, अशी मागणी ऊस दर नियंत्रण मंडळाचे माजी सदस्य प्रल्हाद इंगोले यांनी साखर सहसंचालकांकडे केली आहे.राज्य सरकारने केंद्राच्या एकरकमी एफआरपी कायद्याविरोधात जाऊन दोन टप्प्यांत एफआरपी देण्याचे धोरण स्वीकारले.

ऊस गाळपाला गेल्यानंतर पंधरा दिवसांत एफआरपी रक्कम शेतकऱ्यांना मिळणे अपेक्षित होते. परंतु राज्य सरकारने बेकायदेशीररीत्या केंद्राच्या कायद्याची मोडतोड करून दोन टप्प्यांत एफआरपी देण्याचे धोरण स्वीकारले.

हंगाम बंद झाल्यानंतर संपूर्ण रक्कम शेतकऱ्यांना मिळणे बंधनकारक होते. परंतु गाळप हंगाम बंद होऊन चार महिने उलटून गेले तरीही नांदेड विभागातील ‘भाऊराव’, ‘पूर्णा’, ‘टोकाई’, ‘बळीराजा’, ‘कुंटूरकर शुगर’, ‘एमव्हीकेशुगर’, ‘वाघलवाडा’,

‘देशमुख ग्रुप’, ‘सिद्धी शुगर’ यासह बहुतांश साखर कारखानदारांनी एफआरपी रक्कम अद्याप शेतकऱ्यांना दिलेली नाही.आजघडीला नांदेड विभागातील साखर कारखानदारांकडे दीडशे कोटी रुपये शेतकऱ्‍यांचे देणे बाकी आहे.

त्यामुळे या सर्व कारखानदारांना विलंब व्याज आकारणी सुरू करावी. शेतकऱ्यांना व्याजासह एफआरपी देण्यासाठी कारखानदारांना निर्देशित करावे, अन्यथा आंदोलन करण्यात येईल, असा इशारा इंगोले यांनी दिला.