सोलापूरः जिल्ह्याची वरदायिनी असलेल्या उजनी धरणामध्ये (Ujani Dam) वरच्या धरणाकडून येणाऱ्या पाण्याच्या विसर्गात काहीशी घट झाली असली, तरी पाण्याच्या विसर्गात सातत्य आहे. त्यामुळे बुधवारी (ता. ३) धरणाची पाणीपातळी ८० टक्क्यांवर पोहोचली.

जुलै महिन्याच्या पहिल्या आठवड्यात उणे पातळीत असलेल्या उजनी धरणाची (Ujani Dam) पाणीपातळी (Water Storage) आता ऑगस्टच्या पहिल्या आठवड्यात तब्बल ८० टक्क्यांपर्यंत पोहोचली आहे. अवघ्या महिनाभरातच धरण शंभर टक्क्यांपासून अवघ्या काही अंतरावर आले आहे.

विशेष म्हणजे सोलापूर जिल्ह्यात तुलनेने कमी पाऊस झाला आहे. पण धरणाच्या वरच्या बाजूला पुणे जिल्ह्यात धरणांतील पाणलोट क्षेत्रात झालेला पाऊस आणि तिकडील धरणातील अतिरिक्त पाणी उजनी धरणात सोडण्यात येत आहे. बुधवारीही (ता.३) दौंडकडून उजनी धरणात ३१०५ क्युसेक इतके पाणी सुरू होते.

उपयुक्त साठा ४३ टक्के

उजनी धरणामध्ये बुधवारी (ता.३) एकूण पाणीपातळी ४९५.८८५ मीटरपर्यंत होती. तर पाण्याचा एकूण साठा १०६.४७ टीएमसी एवढा राहिला. तर त्यापैकी उपयुक्त साठा ४२.८१ टीएमसी इतका होता. तर पाण्याची टक्केवारी ७९.९१ टक्क्यांपर्यंत पोहोचली. यंदा हंगामाच्या दुसऱ्याच महिन्यात उपयुक्त साठा जवळपास ४३ टक्क्यांवर पोहोचल्याने जिल्ह्यातील शेतकऱ्यांना दिलासा मिळाला आहे.