Nanded News : अपघातात मृत्युमुखी पडलेल्या शेतकऱ्यांना गोपीनाथ मुंडे शेतकरी अपघात सुरक्षा सानुग्रह अनुदान योजनेतून दोन लाखांचे अनुदान देण्यात येते. परंतु हे अनुदान मंजुरीसाठी तहसीलदारांना वेळच मिळत नसल्याने लोहा, उमरी व धर्माबाद तालुक्यांतील प्रस्ताव रखडले आहेत.

शेती व्यवसाय करताना विविध कारणाने शेतकऱ्याचा मृत्यू झाला तसेच कायमचे अपंगत्व आले तर त्यांच्या कुटुंबीयांना दोन लाख सानुग्रह अनुदान देण्यात येणारी गोपीनाथ मुंडे शेतकरी अपघात सुरक्षा सानुग्रह अनुदान योजना राज्य सरकारने ता. १९ एप्रिल २०२३ रोजी सुरू केली आहे.

ही योजना सुरू झाल्यानंतर जिल्ह्यातील १६ तालुक्यांतून अनुदानासाठी ६२ प्रस्ताव दाखल झाले. यातील ३१ प्रस्ताव मंजूर, तर पाच प्रस्ताव नामंजूर झाले आहेत. यातील २६ प्रस्तावांपेकी काही प्रस्ताव कागदपत्रांअभावी, तर काही प्रस्ताव तहसीलदारांना वेळ मिळत नसल्याने तालुकास्तरावर पेंडिंग असल्याची धक्कादायक माहिती समोर आली आहे. यात लोहा, उमरी व धर्माबाद तहसीलचा समावेश असल्याची माहिती सूत्राने दिली.

शेतकऱ्यांचे प्रस्ताव मंजुरीसाठी तालुकास्तरीय समितीपुढे ठेवले जातात. या समितीच्या अध्यक्षपदी तहसीलदार, सदस्यपदी गटविकास अधिकारी, पोलिस निरीक्षक, तालुका आरोग्य अधिकारी, सहायक प्रादेशिक परिवहन अधिकारी, तर सदस्य सचिवपदी तालुका कृषी अधिकाऱ्यांची नेमणूक केली आहे.

योजनेच्या प्रारंभापासून ६२ प्रस्ताव दाखल

यात नांदेड तालुक्यातून तीन प्रस्ताव दाखल झाले होते. यातील एक मंजूर तर दोन कागदपत्रांअभावी पेंडिंग आहेत. अर्धापूर दोनपैकी एक मंजूर एक पेडिंग, मुदखेड दोनपैकी दोन मंजूर, लोहा दाखल तीनपैकी तीनही बैठकीअभावी पेंडिंग, देगलूर पाचपैकी चार मंजूर एक कागदपत्राअभावी पेंडिंग, बिलोली नऊपैकी दोन मंजूर दोन नामंजूर व पाच कागदपत्रांअभावी पेंडिंग, नायगाव तीनपैकी तीन मंजूर, धर्माबाद दोनपैकी दोन बैठकींअभावी पेंडिंग, किनवट एकपैकी एक मंजूर, हिमायतगनर तीनपैकी तीन मंजूर, भोकर आठपैकी सात मंजूर एक पेंडिंग, हदगाव चार दाखल, बैठक झाली पण सध्या चारही पेंडिंग, उमरी बैठकीअभावी पाचपैकी पाच पेंडिंग, कंधार चारपैकी दोन मंजूर एक नामंजूर एक पेंडिंग व मुखेड सहापैकी दोन मंजूर तर चार कागदपत्रांअभावी पेंडिंग.