ॲग्रोवन वृत्तसेवा
अमरावती : प्रॉम (फॉस्फेट रिच अॉर्गेनिक मॕन्यूअर) आणि पीडीएम (पोटॕश डिराईव्हड फॉर्म मोलॕसेस) (PDM) खताची डीएपीच्या नावावर विक्री करण्याचा गोरखधंदा शेतकऱ्यांनीच उधळून लावला.

चांदूरबाजार तालुक्यातील जसापूर येथील या घटनेत पुरवठा करण्यात आलेले खत रामतीर्थ येथील पातुर्डे कृषी सेवा केंद्रातील असल्याचे कृषी अधिकाऱ्यांनी सांगितले.

चांदूर बाजार तालुक्यातील जसापूर येथे महिनाभरापूर्वी काही युवकांनी शेतकऱ्यांना घरपोच डीएपी खताचा पुरवठा करणार असल्याचे सांगितले होते.

त्यासाठी आगाऊ नोंदणी करून ठराविक रक्कमेची मागणी करण्यात आली. शेतकरी प्रदीप बंड यांच्याकडूनही त्यांनी नऊ पोत्यांकरिता ३ हजार रुपये आगाऊ स्वीकारले.

मात्र हा सारा प्रकार बनवाबनवीचा असल्याचे लक्षात आल्यानंतर बंड यांनी उपविभागीय कृषी अधिकारी राहुल सातपुते यांना माहिती दिली. दरम्यान, शुक्रवारी (ता.६) छोट्या मालवाहू वाहनातून खत घेऊन काही युवक खत देण्यासाठी गावात आले.

सातपुते यांनी त्याची पडताळणी केली. त्यावेळी  प्रॉम आणि पीडीएम खत दिले जात असल्याचे लक्षात आले. खताच्या बॅगवर ५०० ते ६०० रुपये किंमत असताना शेतकऱ्यांकडून प्रत्येक पोत्यासाठी १५०० रुपये घेतले होते.

कृषी अधिकाऱ्यांनी खत जप्त करून त्याचे नमुने घेत ते तपासणीसाठी प्रयोगशाळेकडे पाठविले. प्रयोगशाळेचा अहवाल आल्यानंतर या प्रकरणी कारवाई करू, अशी माहिती सातपुते यांनी दिली.

चांदूरबाजार तालुक्यात ४० बॕगांचा पुरवठा

चांदूरबाजार तालुक्यात ४० बॕग खतांचा पुरवठा करण्यात आला. हे खत दर्यापूर तालुक्यातील रामतीर्थ गावच्या पातुर्डे कृषी सेवा केंद्रातील असल्याची बाब प्राथमिक चौकशीत समोर आली आहे.

रोशन पातुर्डे हे या कृषी सेवा केंद्राचे संचालक असून त्यांची शेतकरी कंपनी असल्याचा  खुलासा होताच दर्यापूर तालुका कृषी अधिकाऱ्यांनी तडकाफडकी रामतीर्थ गाठत संबंधितांची झाडाझडती घेतल्याची माहिती आहे.

त्यामुळे आता याप्रकरणी पुढील काय कारवाई होते, याकडे सर्वांचे लक्ष लागले आहे.