Agri Student Protest नगर ः महाराष्ट्र लोकसेवा आयोगातर्फे (MPSC) कृषी सेवा मुख्य परीक्षा २०२१-२०२२ ला तत्काळ स्थगिती देऊन अभ्यासक्रम पूर्वीप्रमाणे करावेत, यासह विविध मागण्यांसाठी कृषी अभियांत्रिकी (Agriculture Engineering) महाविद्यालयाच्या विद्यार्थ्यांनी महात्मा फुले कृषी विद्यापीठात सुरू केलेल्या आंदोलनाला शुक्रवारी (ता.१०) सतरा दिवस झाले आहेत. गुरुवारी (ता. ९) रात्री या विद्यार्थ्यांनी कॅण्डल मार्च काढून आंदोलन (Student Protest) केले.

महाराष्ट्र राज्य कृषी अभियांत्रिकी संघटनेतर्फे राहुरीच्या महात्मा फुले कृषी विद्यापीठासह डॉ. बाळासाहेब सावंत कोकण विद्यापीठ, डॉ. पंजाबराव देशमुख कृषी विद्यापीठ, अकोला व वसंतराव नाईक कृषी विद्यापीठ परभणी या चारही कृषी विद्यापीठांच्या मुख्य प्रशासकीय इमारतीसमोर विद्यार्थ्यांनी २५ जानेवारीपासून ठिय्या आंदोलन सुरू केले.

शासकीय व खासगी कृषी अभियांत्रिकी महाविद्यालयांत पदवी व पदव्युत्तर शिक्षण घेणारे, उत्तीर्ण झालेले व पीएचडी करणारे विद्यार्थी आंदोलनात सहभागी आहेत.

शुक्रवारी (ता.१०) आंदोलनाचा सतरा दिवस होता. गुरुवारी रात्री विद्यार्थ्यांनी कॅण्डल मार्च काढून निषेध व्यक्त केला. सरकार दखल घेत नसल्याने विद्यार्थ्यांनी या वेळी संताप व्यक्त केला.