देऊळगावराजा, जि. बुलडाणा : सध्या वीज वितरण कंपनीमार्फत शेतीपंपाची वीजतोडणी (Electricity Connection) केली जात असून, ही सक्तीची वीजबिल वसुली आणि शेतीपंपावरील वीज (Agriculture Pump Electricity) खंडित करण्याची कारवाई तत्काळ थांबवावी, अशी मागणी शिवसेना व युवा सेनेच्या पदाधिकाऱ्यांनी केली आहे. या बाबत महावितरणला निवेदन दिले.

उद्धव बाळासाहेब ठाकरे शिवसेना गटाच्या कार्यकर्त्यांनी स्थानिक वीज वितरण कार्यालयात जात अधिकाऱ्यांसोबत शेतकरी व वीज ग्राहकांच्या विविध समस्यांवर चर्चा केली. या वेळी तालुका प्रमुख दादाराव खार्डे, शहर प्रमुख अजय शिवरकर, युवा सेना तालुकाप्रमुख प्रकाश बस्सी, माजी उपनगराध्यक्ष पवन झोरे यांनी सक्तीच्या वसुलीसाठी शेतकऱ्यांच्या विजपंपावरील विद्युत पुरवठा खंडित केला जात असल्याची बाब निदर्शनात आणून दिली.

या कारवाईमुळे अनेक शेतकऱ्यांची रब्बी पिके धोक्यात आली आहेत. अशा वेळी सक्तीची वीजबिल वसुली थांबवावी. महावितरणच्या उपविभागीय कार्यकारी अभियंत्यांना पदाधिकाऱ्यांनी निवेदन दिले. वीज ग्राहकांवर होणारा हा अन्याय तत्काळ थांबवावा, शेतीपंपावरील वीज कुठल्याही परिस्थितीत खंडित करू नये, अन्यथा डफडे बजाव व ताला ठोको आंदोलन करू, असा इशारा देण्यात आला आहे.