Mumbai News : केंद्रातील भाजप सरकार असो वा राज्यातील शिंदे- फडणवीस सरकार दोन्हीही शेतकरीविरोधी आहेत. नमो शेतकरी महासन्मान योजना फसवी आहे. शेकऱ्यांना खरोखर मदत करायची असेल, तर कृषी साहित्यावरील वस्तू व सेवा करातून (जीएसटी) होणारी लूट थांबवा, अशी मागणी काँग्रेस प्रदेशाध्यक्ष नाना पटोले यांनी केली.

अवकाळी पावसाने झालेल्या नुकसानीच्या मदतीची घोषणा विधानसभेत करूनही अजून शेतकऱ्यांना ती मिळालेली नाही. राज्यातील निवडणुका डोळ्यांसमोर शेतकरी महासन्मान निधीच्या नावाखाली तुटपुंजी मदत देऊन शेतकऱ्यांना आकर्षित करण्याचा डाव आहे, असा आरोपही त्यांनी केला.

पत्रकात म्हटले आहे, शिंदे फडणवीस सरकारच्या या षड्‍यंत्राला शेतकरी बळी पडणार नाहीत. खते, बी-बियाणे, शेती साहित्यावर जीएसटी लावून शेतकऱ्यांची लूट सुरू आहे. सरकारला जर शेतकऱ्यांना खरेच मदत करायची असेल तर त्यांनी कृषी साहित्यावरील जीएसटीतून होत असलेली शेतकऱ्यांची लूट थांबवावी.

शेतकरी महासन्मान योजना ही फसवी आहे. महागाईमुळे शेती करणे परवडत नाही. शेतीमालाला भाव मिळत नाही, शेतकरी आपला शेतमाल रस्त्यावर फेकून देत आहेत. शेतकऱ्यांचे उत्पन्न दुप्पट करणार, हमीभाव देणार या वल्गना हवेत विरल्या आहेत. शेतकऱ्यांमध्ये भारतीय जनता पक्षाबद्दल तीव्र संताप आहे.

नुकसानभरपाई जाहीर करूनही ती अद्याप शेतकऱ्यांना मिळालेली नाही. भाजपप्रणीत शिंदे सरकार केवळ घोषणा करत आहे. शेतकऱ्यांकडून १०० रुपये लुटायचे आणि १ रुपयाची मदत द्यायची ही बनियावृत्ती आहे.

निवडणुका डोळ्यांसमोर असल्याने त्यांना शेतकऱ्यांची आठवण झाली आहे पण शेतकऱ्यांवर या तुटपुंज्या मदतीचा काहीही परिणाम होणार नाही, असेही म्हटले आहे.