ST Employee Protest : महाराष्ट्र एसटी कामगार संघटनेने विविध प्रलंबित मागण्यांसाठी १३ सप्टेंबर पासून राज्यभरात बेमुदत उपोषण करण्याचा निर्णय घेतला आहे. त्यामुळे सणसुदीत पुन्हा लाल परीची चाके थांबणार आहेत. या उपोषणाच्या पार्श्भूमीवर एसटी महामंडळाचे सामान्य प्रशासन विभागाचे महाव्यवस्थापक अजित गायकवाड यांनी जे कर्मचारी या उपोषणात सहभागी होतील, अशा कर्मचाऱ्यांवर शिस्तभंगाची कारवाई करण्याचे आदेश राज्यातील सर्व विभाग नियंत्रक यांना दिले आहेत.

दीड वर्षांपूर्वी एसटी कामगारांनी एसटी महामंडळ विलीनीकरणाच्या मागणीसाठी राज्यभरात संप पुकारला होता. यावेळी राज्य सरकाराने कामगारांच्या अनेक मागण्या मान्य केल्या होत्या. त्यानंतर कामगारांनीनी संप मागे घेतला होता. परंतु, सरकारने मान्य केलेल्या कामगारांच्या मागण्यांची पूर्तता अद्यापही केलेली नाही. त्यामुळे महाराष्ट्र एसटी कामगार संघटनेने या मागण्यांची पूर्तता करण्यासाठी १३ सप्टेंबरपासून बेमुदत उपोषणाची हाक दिली आहे.

तत्पूर्वी ११ व १२ सप्टेंबर रोजी महाराष्ट्र एसटी कामगार संघटनेचे पदाधिकारी सरकारचे लक्ष वेधण्यासाठी मुंबई येथील आझाद मैदानावर उपोषण करणार आहेत, जर या दोन दिवसात सरकारने एसटी कर्मचाऱ्यांच्या मागण्यांकडे सकारात्मक निर्णय न घेतल्यास १३ सप्टेंबरपासून राज्यभरात एसटी कामगार संघटनेतर्फे उपोषण पुकारले जाणार आहे.