Kharif Season Kolhapur : मागच्या काही दिवसांपासून कोल्हापूर जिल्ह्यात पावसाने दडी मारल्याने शेतकरी हवालदिल झाला आहे. जिल्ह्यात दडी मारलेल्या पावसाने काल(ता.२५) जोरदार हजेरी लावली. त्यामुळे वातावरणात गारवा निर्माण होण्यासह पिकांना दिलासा मिळाला आहे. परंतु मागच्या काही दिवसांपासून पाऊस नसल्याने अनेक पिकांवर रोगाचा प्रादुर्भाव होण्याची शक्यता आहे.

दरम्यान काल(ता.२५) कोल्हापूर जिल्ह्यात जुलै महिन्यात जोरदार पाऊस झाला. त्यानंतर ऑगस्टच्या पहिल्या आठवड्यापासून थांबलेल्या पावसाने काल थोडासा दिलासा दिला. दरम्यान श्रावणात अधून- मधून येणाऱ्या जोरदार सरीही या महिन्या पहायला मिळाल्या नाहीत. उन्हाचा तडाख्यामुळे हैराण झालेल्या नागरिकांसह पिके करपण्याची भिती होती.

कोल्हापूरच्या पश्चिम भागातून पावसाला जोरदार सुरुवात झाली. हळूहळू संपूर्ण जिल्ह्यात कमी अधिक प्रमाणात जोरदार पावसाने झोडपून काढले. त्यामुळे भात, भुईमूग, सोयाबीनसह इतर पिकांना मोठा दिलासा मिळाला आहे. माळरानातील पिकांना पाण्याअभावी आणि पावसाअभावी मरगळ आली होती. आजच्या पावसाने ही पिके आणखी मोठा पाऊस होईपर्यंत तग धरू शकणार आहेत. जिल्ह्यातील गगनबावडा, शाहूवाडी, करवीर, कोल्हापूर शहरात जोरदार पाऊस झाला.

दरम्यान कोल्हापूर जिल्ह्यातील शिरोळ, हातकणंगले या तालुक्यात समाधानकारक पाऊस नसल्याने खरीप पिके अडचणीत येऊ लागली आहेत. पिकांना पाणी नसल्याने पीक माना टाकत आहे. त्यांना वाचवण्यासाठी बळीराजा धडपड करताना दिसत आहे.

वळीव, मृग नक्षत्र वाया गेल्याने शेतकऱ्यांनी जुलै महिन्यात पेरणी केली. हातकणंगले तालुक्यात सुमारे १० हजार हेक्टर सोयाबीन पिकाची लागवड आहे; तर सुमारे ९ हजार ५०० हेक्टरवर भुईमूग पीक आहे.

जिल्ह्यात पंचगंगा नदी आठवडाभर इशारा पातळीवर असली तरी हातकणंगले तालुक्यात समाधानकारक पाऊस झाला नाही. पेरण्या उशिरा कराव्या लागल्या. यातच आता पावसाने पुन्हा ओढ दिल्याने पिके कशी जगवायची, याची चिंता शेतकऱ्यांना लागली आहे.