Parbhani News : पंतप्रधान पीकविमा योजनेअंतर्गत यंदाच्या २०२३ खरीप हंगामात रविवार (ता. १६) सकाळ पर्यंत परभणी व हिंगोली जिल्ह्यातील मिळून ६ लाख ५८ हजार ४३३ शेतकऱ्यांनी पीकविम्याचे अर्ज दाखल आहेत. या शेतकऱ्यांनी एकूण ४ लाख २० हजार २२८ हेक्टरवरील पिके विमा संरक्षित केली आहेत.

परभणी जिल्ह्यात यंदा आजवर ४ लाख ४ हजार ६३४ शेतकऱ्यांनी पीकविमा अर्ज दाखल केले आहेत. त्या कर्जदार ४९९ व बिगर कर्जदार ४ लाख ४ हजार १३५ शेतकरी हे बिगर कर्जदार आहेत. या शेतकऱ्यांनी २ लाख ६१ हजार २४० हेक्टरवरील पिकांसाठी १ हजार ३६३ कोटी १९ लाख रुपये एवढ्या विमा रकमेचे संरक्षण घेतले आहे.

शेतकऱ्यांनी प्रतिअर्ज १ रुपयानुसार ४ लाख ४६ हजार ६१२ रुपये विमा हप्ता भरला आहे. तर राज्य शासनाच्या हिश्शाचा २१० कोटी १० लाख रुपये व केंद्र शासनाच्या हिश्शाचा १७६ कोटी ५ लाख रुपये मिळून एकूण ३८६ कोटी १९ लाख रुपये विमा हप्ता आहे. हिंगोली जिल्ह्यात आजवर २ लाख ५३ हजार ७९९ शेतकऱ्यांनी पीकविम्याचे अर्ज भरले आहेत.

त्यात ८६३ कर्जदार व २ लाख ५२ हजार ९३६ बिगर कर्जदार शेतकरी आहेत.या शेतकऱ्यांनी १ लाख ५८ हजार ९८८ हेक्टरावरील पिकांसाठी ८३८ कोटी ९५ लाख रुपये एवढ्या विमा रकमेचे संरक्षण घेतले आहे.

शेतकऱ्यांनी प्रतिअर्ज १ रुपयानुसार २ लाख ५३ हजार ७९४ रुपये विमा हप्ता भरला आहे. राज्य शासनाच्या हिश्शाचा ८३ कोटी ६० लाख रुपये व केंद्र शासनाच्या हिश्शाचा ६४ कोटी ६४ लाख रुपये मिळून एकूण १४८ कोटी रुपये विमा हप्ता आहे.

अन्यथा गुन्हे दाखल करणार...

अधिसूचित क्षेत्रातील अधिसूचित पिकांसाठी खातेदारांच्या व्यतिरिक्त कुळाने अगर भाडेपट्टीने शेती करणारे शेतकरी या योजनेत सहभागी होण्यास पात्र आहेत. भाडेपट्टीने शेती करणाऱ्यास नोंदणीकृत (रजिस्टर्ड) भाडेकरार असणे गरजेचे आहे.

परंतु असे असतानाही जिल्ह्यामध्ये काही शेतकरी नोंदणीकृत भाडे करार नसतानाही दुसऱ्या शेतकऱ्यांच्या नावावरील जमिनीवरच्या पिकांचा पीक विमा काढत असल्याचे आढळून आले आहे.

यापुढे जर अश्या गैरप्रकाराच्या तक्रारी प्राप्त झाल्या तर सामूहिक सेवा केंद्र चालक व पीक विमा भरलेले शेतकरी दोन्हीवर फौजदारी गुन्हा दाखल करण्यात येईल याची नोंद घ्याव, असे कृषी विभागाच्या सूत्रांनी सांगितले.