Fish Farming News नाशिक : विदेशी मागूर हा अति मांसहारी मासा आहे. यामुळे मानवास हानिकारक कर्करोगजन्य आजार अथवा इतर आजार होण्याची शक्यता असते.

त्यामुळे नाशिक विभागामध्ये मागूर मासा उत्पादन व विक्रीवर मत्स्यव्यवसाय विभाग बारकाईने नजर ठेवून आहे.

या पार्श्वभूमीवर आगर टाकळी येथील एका घरात व घराबाहेर जवळपास तीनशे किलो मागूर मासा जप्त करण्यात आला आहे.

या संदर्भात मत्स्य व्यवसाय विभाग व उपनगर पोलिस यांनी संयुक्तरित्या कारवाई केली आहे.

केंद्र शासनाच्या निर्णयानुसार विदेशी मागूर (थाई मागूर/आफ्रिकन मागूर) या माशांचे मत्स्यसंवर्धन करणे, वाहतूक व विक्री करण्यास बंदी आहे. त्यामुळे नाशिक विभागातील नाशिक व नगर जिल्ह्यात कारवाया सुरू आहेत.

मत्स्य व्यवसाय विभागातील अधिकाऱ्यांना माहिती मिळाली असता, संशयित घराजवळ भेट दिली. यावेळी संशयित किशोर काशिनाथ आडणे यांच्या घराच्या बाहेरील टाकीत व घरात हा मासा आढळून आला.

जप्त मागूरचा साठा महापालिकेच्या इन्सिनेटरमध्ये नष्ट

नाशिक महापालिकेच्या चाळीस किलोमीटर परिघात मागूर मासा आढळून कारवाई केल्यास नाशिक महापालिकेच्या इन्सिनेटरमध्ये या माशाची विल्हेवाट लावण्यासाठी मत्स्य व्यवसाय विभागाने नाशिक महापालिकेला यासंबंधी पत्र दिले होते.

यावर नाशिक महापालिकेने तत्काळ अंमलबजावणी करण्याचे आदेश दिलेले होते. त्यानुसार कारवाई करून जप्त केलेल्या माशांचा साठा पहिल्यांदाच महापालिकेच्या खत प्रकल्पात असलेल्या इन्सिनेटरमध्ये नष्ट करण्यात आल्याची माहिती मत्स्य व्यवसाय विभागाचे उपायुक्त संजय वाटेगावकर यांनी दिली.