Pune News : आंबेगाव तालुक्यातील ‘पेसा’ क्षेत्रातील सुमारे २५ ते ३० शाळांमधील शिक्षकांची बदली केली. त्या ठिकाणी अद्यापही नवीन शिक्षक रुजू झालेले नाहीत. त्यामुळे या शाळा शिक्षकाविना आहेत. त्यामुळे या भागातील शाळा ओस पडल्या आहेत.

या ठिकाणी तत्काळ शिक्षकांची नियुक्ती करावी, अशी मागणी अखिल भारतीय किसान सभा व स्टुडंट्स फेडरेशन ऑफ इंडिया (एसएफआय) यांनी गटविकास अधिकाऱ्यांकडे गुरुवारी (ता.१३) केली.

एका शिक्षकाने पहिली ते चौथीपर्यंत चार वर्ग तर दुसऱ्या शिक्षकाने पाचवी ते सातवीपर्यंतचे वर्ग सांभाळत विद्यार्थ्यांना कसे शिकवायचे हा प्रश्न निर्माण झाला आहे. यामुळे आदिवासी भागातील विद्यार्थ्यांच्या शिक्षणावर गंभीर परिणाम होत आहेत.

किसान सभेचे जिल्हा सहसचिव अशोक पेकारी म्हणाले, ‘‘संबंधित अधिकाऱ्यांनी पेसा क्षेत्रातील शिक्षकांची बदली करताना त्याच्या जागेवर नवीन शिक्षक नियुक्तीचा विचार केला नाही. शिक्षकांची नियुक्ती करावी अन्यथा मंगळवारी (ता.१८) पालक, विद्यार्थ्यांना सोबत घेऊन शाळांना कुलूप लावून आंदोलन करू.’’

‘‘संबंधित विभागाने आदिवासी पेसा क्षेत्रात त्वरित कायमस्वरूपी शिक्षक रुजू करावे व नव्याने शिक्षक भरती करून बेरोजगार तरुणांना रोजगार द्यावा आणि विद्यार्थ्यांची शिक्षणापासून होणारी परवड थांबवावी,’’ असे ‘एसएफआय’चे सचिव समीर गारे म्हणाले.