Pali News : मुसळधार पावसामुळे पालीतील सरसगड किल्ल्याच्या पायथ्याशी असलेल्या वाघजाई नगर येथे शुक्रवारी (ता. २१) दरड कोसळली. सुदैवाने कोणतीही जीवित वा वित्त हानी झाली नाही. अष्टविनायक तीर्थक्षेत्र असलेले पाली शहर सरसगडाच्या पायथ्याशी वसले असून जवळच लोकवस्ती आहे. त्यामुळे अतिवृष्टीत शहरावर दरडीचे सावट कायम असते.

वाघजाई नगर येथे किल्ल्यावरील मातीचा काही भाग ढासळला. याबाबत माहिती मिळताच नगरपंचायत समितीमार्फत पाहणी करण्यात आली.

सरसगडाला लागूनच वाघजाई नगर, वरचा देऊळवाडा, श्रीकृष्ण नगर, बेगरआळी, उंबरवाडी, सावंत आळी, राम आळी, मधली आळी तसेच तळई व दापोडे या आदिवासी वाडी तसेच ग. बा. वडेर हायस्कूल आणि पालीवाल महाविद्यालय आहे.

त्यामुळे किल्ल्यावरून दरड कोसळल्यास मोठी हाती होण्याची शक्‍यता आहे. इर्शाळवाडीतील दरड कोसळम्याच्या दुर्घटनेनंतर सरसगडाच्या पायथ्‍याशी पाहणाऱ्या नागरिकांमध्येही भीतीचे वातावरण आहे.

मगरीची सुरक्षित अधिवासात सुटका

माणगाव : माणगाव कचेरी रोड येथील मंगलमूर्ती कॉम्प्लेक्ससमोर गुरुवारी (ता. २०) रात्री साडेअकराच्या सुमारास सात फूट लांबीची मगर रस्त्यावर फिरताना दिसली. त्‍यामुळे नागरिकांत घबराटीचे वातावरण निर्माण झाले होते.

वन विभाग, पोलिस व कोलाड रेस्क्यू पथकाने बचावकार्य करून मगरीला सुखरूप नैसर्गिक अधिवासात सोडले. मगरीला पाहण्यासाठी उत्साही मंडळींनी गर्दी केली होती. रस्‍त्‍यावरून एका इमारतीत शिरलेल्‍या मगरीला काळ नदीत सोडले.