मनमाड, जि. नाशिक ः सध्या कांद्याचे दर दररोज घसरत आहेत. घसरणाऱ्या दरामुळे शेतकऱ्याला कांद्याचा उत्पादन खर्च (Onion Production Cost) देखील मिळत नाही.

त्यामुळे शेतकरी आर्थिक संकटात सापडला आहे. कांद्याला चांगला दर (Onion Rate) मिळावा यासाठी महाविकास आघाडीने शुक्रवारी (ता. १७) सरकारचे लक्ष वेधण्यासाठी मनमाड-चांदवड रस्त्यावरील बाजार समितीच्या गेटवर रास्ता-रोको (Rasta Roko) आंदोलन केले.

मनमाड येथे महाविकास आघाडी तर्फे मनमाड-चांदवड रस्त्यावर बाजार समिती गेटसमोर आंदोलकांनी कांदा ओतला. कांद्याला भाव मिळावा, निर्यात बंदी उठवावी, खतांच्या किमती कमी कराव्या, अशा विविध मागण्यांसाठी हा रास्ता-रोको करण्यात आला.

या आंदोलनात शेतकरी सहभागी झाले होते. अर्धा तासापेक्षा जास्त वेळ झालेल्या या रास्ता-रोको आंदोलनामुळे मनमाड-चांदवड मार्गावरील वाहतूक ठप्प झाली होती. आंदोलनात महाविकास आघाडीतील कॉंग्रेस, राष्ट्रवादी, शिवसेना (ठाकरे गट) कार्यकर्ते यांच्यासह शेतकरी मोठ्या संख्येने सहभागी झाले होते.