परभणी ः उसाला प्रतिटन एफआरफपी (Sugar Cane FRP) अधिक ३५० रुपये भाव द्यावा यासह शेतकऱ्यांच्या (Farmer) विविध मागण्यांसाठी सोमवारी (ता. १४) स्वाभिमानी शेतकरी संघटनेतर्फे परभणी गंगाखेड राष्ट्रीय महामार्गावरील सिंगणापूर फाटा (ता. परभणी) येथे रास्ता रोको आंदोलन करण्यात आले.

साखर कारखान्यांनी शेतकऱ्यांच्या उसाला प्रतिटन एफआरपी अधिक ३५० रुपये भाव द्यावा. ऊस तोडीसाठी शेअर्सची अट रद्द करण्यात यावी. अतिवृष्टी बाधित शेतकऱ्यांना पीकविमा तसेच शासनाकडून आर्थिक मदत तत्काळ देण्यात यावी आदी मागण्यांसाठी करण्यात आलेल्या रास्तारोको आंदोलनात स्वाभिमानी शेतकरी संघटनेचे जिल्हाध्यक्ष किशोर ढगे, दामुअण्णा इंगोले, भास्कर खटींग, गजानन तुरे, डिंगाबर पवार, रामप्रसाद गमे, बाळासाहेब घाटुळ, मुंजाजी लोडे, केशव आरमळ आदींसह शेतकरी मोठ्या संख्येने सहभागी झाले होते.