Maharashtra News : राज्यातील मोठे राजकीय पक्ष छोट्या पक्षांना जुमानत नसल्याने अनेक छोट्या संघटनांसह पक्ष एकत्र येत राज्यात छोट्या पक्षांची नवी आघाडी तयार करण्यात आली असल्याची माहिती राजू शेट्टी यांनी दिली. याला प्रागतिक विचार मंच असे नाव देण्यात आले आहे. याबाबत लवकरच बैठक कोल्हापुरात होणार असल्याची माहिती शेट्टी यांनी दिली.

ते पुढे म्हणाले की, देशात भाजप विरोधात सर्व विरोधी पक्ष एकत्र येत आहेत. एनडीए विरुद्ध इंडिया असे समीकरण सध्या पहायला मिळत आहे. विरोधी नेत्यांच्या बैठकाही होताना दिसत आहेत. आम्ही एनडीए आणि मविआ मध्ये नसलेले छोटे पक्ष एकत्र येऊन हे नविन समिकरण मांडण्याचा प्रयत्न करणार असल्याची माहिती राजू शेट्टी यांनी दिली.

राज्यात महाविकास आघाडीची स्थापना झाली त्यावेळी छोट्या पक्षांचा सुद्धा महत्त्वाचा वाटा होता. मात्र, सरकार स्थापन झाल्यानंतर सरकार मधले जे प्रस्थापित पक्ष होते त्यानी छोटा पक्षांना डावललं यामुळे आम्हाला महाविकास आघाडीचा अनुभव अतिशय वाईट आला. सत्ता प्राप्त होतात महाविकास आघाडीच्या नेत्यांना सुद्धा वेगळेच डोहाळे लागले.

याचबरोबर भाजप व एनडीए कडून सुरू असलेल राजकारण हे अत्यंत वाईट असून भाजपने फोडा आणि जोडा पद्धतीचे आणि धार्मिक तेढ निर्माण करत जे राजकारण सुरू केले आहे याला आमचा विरोध असल्याने आम्ही नवीन समिकरणे मांडणार असल्याचे राजू शेट्टी यांनी सांगितलं.

राज्यातील असलेले मोठे प्रस्थापित पक्ष हे आपल्या मूळ विचारधारेपासून लांब जात असून या पक्षातील नेत्यांमध्ये स्वार्थ मोठ्या प्रमाणात बरबटलेला आहे यामुळे पक्ष फुटत आहेत. शिवाय हे पक्ष लोकांपासून देखील लांब जात आहेत.

यामुळे सर्वसामान्य माणसाला जवळचा वाटावा अशी विचारधारा धरून आम्ही सर्व छोटे पक्ष प्रागतिक विकास मंचच्या व्यासपीठाखाली एकत्र आलो आहोत. आमची शक्ती लहान असली तरी आम्ही एकत्र आहोत असे राजू शेट्टी म्हणाले.

या मध्ये स्वाभिमानी शेतकरी संघटना, समाजवादी पक्ष, बहुजन विकास पार्टी, शेकाप यासह काही सामाजिक संघटना एकत्र येत असून पुरोगामी विचाराचे आणि प्रगतीक विचाराचे आम्ही सगळे हे छोटे पक्ष आहोत तसेच यामध्ये अजूनही हळूहळू भर पडत चाललेली आहे. शिवाय लवकरच कोल्हापूरमध्ये सुद्धा एक बैठक घेण्यात येणार आहे असे ही राजू शेट्टी म्हणाले आहेत.