औरंगाबाद : मराठवाड्यात (Marathwada) दोन दिवसांपासून पावसाने सर्वदूर हजेरी लावली आहे. रविवारी (ता. १०) सकाळपर्यंतच्या २४ तासांत औरंगाबाद, जालना, बीड, उस्मानाबाद व लातूर जिल्ह्यांतील सर्व मंडळांमध्ये हलकी, मध्यम, दमदार ते जोरदार पावसाची (Heavy Rainfall) हजेरी लागली. औरंगाबाद व जालना जिल्ह्यांतील चार मंडळांत अतिवृष्टी झाली. १२ तालुक्यांत पावसाचा जोर अधिक होता. सोयगाव तालुक्यात सर्वाधिक सरासरी ६२ मिलिमीटर पावसाची नोंद झाली.

औरंगाबाद जिल्ह्यातील सर्व ६५ मंडळांत रविवारी सकाळपर्यंतच्या २४ तासांत हलका, मध्यम, दमदार ते जोरदार पाऊस (Heavy Rainfall) झाला. जिल्ह्यातील १४ मंडळांत २० ते ४८ मिलिमीटर दरम्यान पाऊस झाला. सोयगाव तालुक्यात पावसाचा जोर सर्वाधिक होता. या तालुक्यातील तीनही मंडळ मिळून सरासरी ६२.४ मिलिमीटर पाऊस नोंदला गेला.

सोयगाव तालुक्यातील सोयगाव मंडळात ७० मिलिमीटर, सावलदबारा मंडळात ७० मिलिमीटर इतक्या अतिवृष्टीची नोंद झाली. कन्नडमधील दोन मंडळासह सिल्लोड तालुक्यात सर्व मंडळात मध्यम ते दमदार पाऊस झाला. औरंगाबाद, पैठण, गंगापूर, खुलताबाद, वैजापूर, फुलंब्री व कन्नड तालुक्यांतील बहुतांश मंडळांत हलका तर काही मंडळात मध्यम पाऊस झाला.

जालना (Jalana) जिल्ह्यातील सर्व ४९ मंडळांत पावसाने हजेरी लावली. परतूर तालुक्यात सर्वाधिक पाऊस झाला. या तालुक्यातील परतूर मंडळात ९९.३ मिलिमीटर तर वाटूर मंडळात ७७.३ मिलिमीटर इतक्या अतिवृष्टीची नोंद झाली. जिल्ह्यातील २० मंडळात २० ते ५१ मिलिमीटर दरम्यान पाऊस नोंदल्या गेला. मंठा तालुक्यात मध्यम ते दमदार, घनसावंगी, बदनापूर तालुक्यात हलका ते मध्यम, जालना, भोकरदन व जाफराबाद तालुक्यात मध्यम ते दमदार तर अंबड तालुक्यात हलक्या पावसाची नोंद झाली.

लातूर (Latur) जिल्ह्यातील सर्व ६० मंडळांत हलका, मध्यम ते दमदार पाऊस झाला. ३३ मंडळांत २० ते ४४ मिलिमीटर दरम्यान पावसाची नोंद झाली. देवणी, शिरूर अनंतमाळ, जळकोट, चाकूर, उदगीर, अहमदपूर तालुक्यांत मध्यम ते दमदार पाऊस झाला. जळकोट व देवणी तालुक्यात पावसाचा जोर सर्वाधिक होता. उस्मानाबाद जिल्ह्यातील सर्व ४२ मंडळांत मध्यम ते दमदार पावसाची हजेरी लागली. परंडा तुळजापूर तालुक्यात पावसाचा जोर सर्वाधिक होता.

पाचही जिल्ह्यांतील परांडा, तुळजापूर, जळकोट, शिरूर अनंतमाळ, देवणी, चाकूर, उदगीर, अहमदपूर, परतूर, भोकरदन, सोयगाव व सिल्लोड तालुक्यांत २५ ते ६२ मिलिमीटर दरम्यान पावसाची नोंद झाली. बीड जिल्ह्यातील सर्वच ६३ मंडळांत पावसाची हजेरी लागली.

जिल्ह्यात सर्व दूर झालेला पाऊस बहुतांश मंडळात तुरळक ते हलक्या स्वरूपाचा तर काही मंडळात मध्यम स्वरूपाचा झाला. दरम्यान रविवारी दुपारपर्यंत औरंगाबाद, जालना, बीड, उस्मानाबाद व लातूर या पाचही जिल्ह्यांतील अनेक भागात कुठे रिमझिम, कुठे संततधार, कुठे सरीवर सरी पाऊस पडणे सुरू होते.