Pune News : पुणे बाजार समितीमधील फळे-भाजीपाला विभागातील डमी अडत्यांना चाप लावण्यासाठी संचालक मंडळाने काढलेल्या आदेशाला अडत्यांनी केराची टोपली दाखविली आहे. एक महिन्यानंतरही एकाही अडत्याने प्रतिज्ञापत्र सादर न केल्याने बाजार समिती संचालक मंडळ आणि प्रशासन अडत्यांपुढे हतबल झाले आहे.

हतबल झालेल्या प्रशासनाने अखेर कारवाईचे हत्यार उपसले असून, मंगळवारपासून (ता.२५) शेतमाल जप्तीच्या कारवाईचे संकेत दिले आहे. मात्र, अडत्यांवर खरोखरच कारवाई होणार की, केवळ फार्स ठरणार हे कारवाईदरम्यान कळणार आहे.

बाजार समितीमध्ये डमी अडत्यांचा सुळसुळाट झाला असून, या सुळसुळाटाला अडते असोसिएशनच्या आजी माजी पदाधिकाऱ्यांचा आशीर्वाद असल्याची चर्चा आहे.

अडते असोसिएशनसह बाजार आवारातील विविध संघटनांच्या पदाधिकाऱ्यांनी आपल्या अडतीच्या मूळ व्यवसायातून निवृत्ती घेत, इतर व्यवसायात बस्तान बसविले आहे. तर बाजार समितीमधील गाळे पाचपेक्षा जास्त डमी अडत्यांना बेकायदा पद्धतीने भाडेतत्वावर देत, भाडे घेण्याचा उद्योग सर्रास झाला आहे.

यामुळे बाजार आवारात दोन हजारांपेक्षा अधिक डमी अडते कार्यरत असून, यांच्यावर निर्बंध आणण्यासाठी संचालक मंडळाने गाळ्यावर केवळ दोन जणांना कामावर ठेवण्याची परवानगी दिली आहे. ही परवानगी देताना, संबंधित दोन कामगारांचे छायाचित्र, निवासी पुराव्यासह प्रतिज्ञापत्र सादर करण्याचे आदेश १७ जून २०२३ रोजी काढले होते.

या परिपत्रकानुसार २० जून अखेर प्रतिज्ञापत्र सादर करण्याच्या सूचना दिल्या होत्या. मात्र दीड महिना होऊन गेला तरी निर्ढावलेल्या अडत्यांनी एकही प्रमाणपत्र सादर केलेले नाही.