Onion Market Update नगर : कांद्याला प्रति क्विंटल अडीच हजार रुपये किमान हमी भाव (Onion MSP) मिळावा व प्रति क्विंटल पाचशे रुपये निर्यात प्रोत्साहन (Onion Export Subsidy) अनुदान मिळावे. यासह विविध मागण्यांसाठी मंगळवारी (ता. २८) राहुरी येथील कृषी उत्पन्न बाजार समितीजवळ स्वाभिमानी शेतकरी संघटनेकडून रास्ता रोको आंदोलन (Farmer Protest) करण्यात येणार आहे, अशी माहिती संघटनेचे जिल्हाध्यक्ष रवी मोरे यांनी दिली.

राज्यात सध्या कांदा उत्पादकांची मोठ्या प्रमाणात परवड होत आहे. गेल्या काही महिन्यांपासून कांद्याचे दर मोठ्या प्रमाणात पडलेले असल्यामुळे कांदा उत्पादकांना खर्चही निघेनासा झाला आहे. कांदा उत्पादकांची मोठ्या प्रमाणात आर्थिक नुकसान होत असतानाही शासनाकडून उत्पादकांना दिलासा देण्यासारखा कुठलाही निर्णय घेतला जात नाही.

कांदा परवडत नसल्यामुळे आता शेतकरी कांद्याचे पीक शेतातच नष्ट करू लागले आहेत. शासनाने कांदा उत्पादनाकडे प्राधान्याने लक्ष देऊन मदत करावी, कांदा निर्यातीवर ५०० रुपये प्रोत्साहन अनुदान मिळावे, कांद्याला हमी भाव २५०० रुपये प्रति क्विंटल मिळावा,

‘नाफेड’मार्फत कांदा २५०० रुपये किंटलने कांदा खरेदी करावी, अतिवृष्टीने व सततच्या पावसामुळे झालेल्या नुकसानीपोटी मदत मिळावी, यासाठी स्वाभिमानी शेतकरी संघटनेकडून मंगळवारी सकाळी दहा वाजता रास्ता रोको आंदोलन करण्यात येणार आहे, असे रवी मोरे यांनी सांगितले.