स्वाभिमानी शेतकरी संघटनेचे अध्यक्ष राजू शेट्टी (Raju Shetty) यांनी सोमवारी (ता.11) पुण्यातील साखर संकुलावर धडक मोर्चा काढला. यावेळी शिष्टमंडळाने साखर आयुक्तांशी चर्चा केली. त्यातून काही निष्पन्न झाले नाही. त्यानंतर आयुक्तांनी मोर्चाला सामोरे जात शेट्टी यांच्याशी चर्चा केली. त्यानंतर आंदोलन शांततेत संपले.

ठळक घडामोडी पुढीलप्रमाणेः

- राजू शेट्टी म्हणाले, राज्यात कोणत्याही शेतकऱ्याला कोणत्याही कारखान्याचा वजनकाटा तपासता येईल. चोरी दिसल्यास कारवाईला भाग पाडू. काटा मारणाऱ्याचा काटा बाजूला काढला जाईल. वजनकाटे तपासणाऱ्या भरारी पथकात शेतकरी वर्गाचेही दोन प्रतिनिधी संघटनेचे असतील. काही मुद्दे केंद्राच्या व काही मुद्दे राज्याच्या अखत्यारित आहेत. मात्र, आपले प्रश्न सोडवण्यासाठी राज्य सरकारला वेळ नाही, असे दिसते आहे. शेतकरी भिकारी नाही. आम्ही भीक नव्हे तर हक्क मागतो आहोत.

- राज्य सरकार सत्तेच्या मस्तीत आहे. शेतकऱ्यांना ही मस्ती उतरवायला वेळ लागणार नाही. थकित एफआरपी मिळणार नसेल तर आम्ही रस्त्यावर येऊ. असा इशाराही शेट्टी यांनी दिला.

- सरकारचे लक्ष वेधण्यासाठी १७ व १८ नोव्हेंबर ला राज्यातील दोन दिवसांच्या तोंडी बंद ठेवणार. ऊस वाहतूक करणारे एकही चाक १७, १८ नोव्हेंबरला चालणार नाही.