वेल्हे, जि. पुणे ः जुलै महिन्याच्या सुरुवातीला सुरू झालेल्या पावसामुळे प्रतीक्षेत असलेल्या वेल्हे तालुक्यातील शेतकऱ्यांची पावसाची प्रतीक्षा (Rain) संपली आहे. तालुक्याच्या सर्वच भागात पावसाने (Rainfall) हजेरी लावली असल्याने भात रोपे (Paddy Seedling) तरारली असून शेतरीवर्गामधून समाधान व्यक्त होत आहे.

तालुक्यातील पश्चिम भागात किल्ले तोरणा, राजगड परिसरात तसेच अठरा गाव मावळ या भागामध्ये पावसाचा जोर अधिक आहे. तर, पूर्वपट्ट्यातील आंबवणे, करंजावणे, सोंडे परिसर या भागांत पावसाचा जोर कमी असला तरी तो समाधानकारक आहे.

वेल्हे तालुक्यामध्ये सर्वाधिक भाताचे उत्पन्न घेतले जाते. त्याचबरोबर नाचणी, वरई ही पिकेही घेतली जातात. लांबलेल्या पावसामुळे भात पेरणी दुबार करावी लागते का, या चिंतेत येथील शेतकरी होता. परंतु जुलै महिन्याच्या सुरुवातीपासून पाऊस सुरू झाल्याने भात पिके तरारली आहेत.

तालुक्यात सर्वाधिक पेरणीच धूळ वाफेवर होते, त्यानुसार पेरणीही झाली. काही ठिकाणी तुरळक पडलेल्या पावसामुळे रोपे उगवली, मात्र दमदार पावसाअभावी ती जळून जाण्याची शक्यता वर्तवली जात होती. पाऊस एक महिना उशिरा आल्याने भात लावणी लांबली, त्यामुळे उत्पादनावर नक्कीच परिणाम होणार आहे. पिके घेताना प्रत्येक पिकाला एक ठरावीक कालावधी लागत असतो. भातपेरणी, लावणी व मळणी या दरम्यान योग्य वेळी पावसाची गरज असतेच अन्यथा दर्जेदार उत्पादन निघत नसल्याची खंत शेतकऱ्यांनी व्यक्त केली.

गेल्या अनेक वर्षांपासून समाधानरित्या पाऊस पडत होता, परंतु यावर्षी पाऊस उशिरा झाल्याने अनेक ठिकाणच्या शेतीच्या लावणी पूर्व मशागती रखडल्या असून याचा भात शेतीच्या उत्पादनावर परिणाम होणार असल्याची माहिती तानाजी कचरे या शेतकऱ्यांनी दिली.