Ratnagiri News : मॉन्सून लांबल्यामुळे यंदा भातशेतीचे वेळापत्रक कोलमडलेले असतानाच रत्नागिरी तालुक्यातील शिरगाव येथील शेतकरी डॉ. मिलिंद यशवंत खेर यांच्या शेतामध्ये हळव्या भाताची रोपे तरारली असून त्यांना लोंब्या आल्या आहेत.

पाण्याची उपलब्धता, वेळेत नियोजन आणि योग्य व्यवस्थापन या जोरावर त्यांनी १२० दिवसांतील कमी कालावधीतील ‘रत्नागिरी १’ या भात बियाण्यांची भात लागवड यशस्वी करून दाखवली आहे. त्यांच्या नियोजनाचे जिल्हा कृषी विभागाकडूनही कौतुक होत आहे.

यंदा मॉन्सून उशिराने दाखल झाला होता. पावसाची वाट न पाहताच शिरगाव येथील डॉ. खेर यांनी पेरण्या दरवर्षीप्रमाणेच १३ जूनला आटपून घेतल्या. याच कालवधीत पावसाने दडी मारली होती. शेतामधील विहिरीवर पंप असल्यामुळे त्याचे पाणी पेरलेल्या शिवाराला वापरले जात होते. त्यामुळे उन्हाचा तडाखा जाणवला नाही. फुटवेही व्यवस्थित आल्यामुळे ७० गुंठ्याला आवश्यक तेवढी रोपे तयार झाली.

३ जुलैला त्यांनी भात लावणीची कामे सुरू केली. साधारपणे ६ जुलैपर्यंत लावण्याही आटोपल्या. दोन महिन्यात त्यांच्या शेतामधील भात रोपांना लोंब्या आल्या आहेत. कोकण कृषी विद्यापिठाअंतर्गत असलेल्या शिरगाव भात संशोधन केंद्राने तयार केलेल्या ‘रत्नागिरी १’ हे हळव्या जातीचे म्हणजेच ११० दिवसांत उत्पादन देणारे बियाणे शेतात वापरले आहे. दोन महिन्यांत भात पसवले आहे.

पावसाची अनियमितता असली तरीही आवश्यक तेव्हा पंपाद्वारे रोपांना पाणी दिले जाते. सेंद्रिय आणि रासायनिक अशा दोन्ही खतांचा योग्य प्रमाणात ते वापर करत आले आहेत. लावणीच्या सुरुवातीला शेणखत टाकले जाते.

त्यानंतर युरिया आणि सुफला या दोन्हीचा योग्य प्रमाणात डोस रोपांना दिला जातो. पावसाने ओढ दिली असली तरीही पाणी पुरेसे असल्यामुळे किड, रोगांचा प्रादुर्भाव जाणवलेला नाही. पेरणीपासून आतापर्यंत ७५ दिवस झाले असून अजून ३५ दिवसांनी भात कापणीयोग्य होईल. दरवर्षी ते याच कालावधीत कापण्या आटपून घेतात.