दौंड : परिसरात गेल्या दोन दिवसांत १२० मिलिमीटर पाऊस पडला आहे. (Heavy Rainfall) त्यामुळे अनेक शेतकऱ्यांचे नुकसान झाले आहे. कृषी सहाय्यक, तलाठ्यांना पिकांचे तातडीने पंचनामे करण्याचे आदेश द्यावेत, आर्थिक मदत द्यावी, अशी मागणी दौंड तालुका भाजप किसान मोर्चाचे तालुकाध्यक्ष अभिमन्यू गिरमकर (Abhimanu Giramkar)यांनी उपविभागीय अधिकारी प्रमोद गायकवाड (Pramod Gaikwad) यांच्याकडे केली.

मागील दोन ते तीन दिवसांत तालुक्यातील देऊळगावराजे, वडगाव दरेकर, पेडगाव, शिरापूर, हिंगणीबेर्डी, काळेवाडी, आलेगाव, बोरीबेल या गावांमध्ये टोमॅटो, कपाशी, ढोबळी मिरची, उसाची नवीन लागण, सोयाबीन, मका या पिकांचे मोठ्या प्रमाणावर नुकसान झाले आहे.

हाताशी आलेले पीक पावसामुळे जमीनदोस्त झाले आहे. त्यामुळे सध्या शेतकऱ्यांना मोठ्या प्रमाणावर आर्थिक नुकसानीस सामोरे जावे लागत आहे. पिकांच्या नुकसानीमुळे शेतकरी हवालदिल झाला आहे. या वेळी सतीश आवचर, लालासाहेब गिरमकर, हरिश्चंद्र ठोंबरे, हेमंत कदम, संतोष पाचपुते, देविदास ढवळे, कपिल माने, हरी आवचर, भागवत काळे आणि शेतकरी उपस्थित होते.