Alibaug News : थळ ग्रामपंचायतीतील गुरचरण जागेची मोजणी करून तारेचे कुंपण घालण्यात येणार आहे. सोमवारी जागेची मोजणी करण्यासाठी ग्रामपंचायतीचे कर्मचारी पोहोचले, मात्र गावातील कोळी बांधवांनी विरोध केल्‍याने तणाव निर्माण झाला होता.

अखेर पोलिसांच्या सुरक्षेत मोजणी करण्यात आली. गुरचरणाच्या जागेत कोळी समाजाचे मासळी सुकवण्याचे सिमेंटचे ओटे आणि मातीचे अंगण आहे. उदरनिर्वाहाचे साधन हिरावले जाणार असल्‍याचे विरोध होत आहे.

तालुक्यातील थळ समुद्रकिनारी ग्रामपंचायतीच्या ताब्यात साडेपाच हेक्टर गुरचरण जागा आहे. ही जागा कुंपण घालून संरक्षित केली जात आहे. या ठिकाणी कोळी बांधवांनी मासळी सुकविण्यासाठी सुरुवातीला मातीची अंगणे तयार केली होती. यानंतर काहींनी सिमेंटचे ओटे तयार केले, मात्र आता या जागेवर धनदांडग्यांच्या नजरा वळल्या आहेत.

गुरुचरणाला लागून असणाऱ्या फार्महाऊसची शोभा बिघडेल, यासाठी संबंधित जागा ताब्यात घेण्याचा प्रयत्न अनेकदा झाला आहे. गुरुचरणाची जागा मोजणी करण्यासाठी अनेकदा पोलिस फौजफाटा मागवण्यात आला आहे. यापूर्वी दोन वेळा मोजणी करण्यासाठी ग्रामपंचायतीने प्रयत्न केला होता.

त्या वेळी जेसीबीच्या साह्याने काही सिमेंटचे ओटे तोडण्यात आले होते. स्थानिकांनी पोलिस बळाला न घाबरता जागा मोजणी आणि कुंपण घालण्यास तीव्र विरोध केला होता. सोमवारी (ता. ११) पुन्हा जागेची मोजणी करण्यासाठी ग्रामपंचायतीने पोलिसांना पाचारण केले होते. कोळीवाडा ग्रामस्थांनी आक्रमक भूमिका घेत मोजणीस विरोध केला.