Solapur News : ऊस गाळप हंगाम २०२२-२३ मधील शेतकऱ्यांच्या उसाच्या थकलेल्या ८१७ कोटी रुपयांच्या ‘एफआरपी’प्रकरणी राज्यातील ८६ कारखान्यांना साखर आयुक्तालयाने नोटिसा काढल्या आहेत. त्यामध्ये सोलापूर जिल्ह्यातील १५ साखर कारखान्यांचा समावेश आहे. जिल्ह्यातील या कारखान्यांकडे १५ जुलैअखेर २२५ कोटी रुपये एफआरपी थकित आहे.

याबाबत साखर कारखान्यांची तीन टप्प्यांत सुनावणी घेऊन कारखान्यांचे म्हणणे ऐकून घेतले जाणार आहे. त्यांनतर तत्काळ एफआरपी न दिल्यास त्या साखर कारखान्यांवर जप्तीची कारवाई होण्याची शक्यता आहे. मागील हंगामात उसाची ऊसतोडणी वाहतूक खर्चासह एफआरपी ३५ हजार ५२४ कोटी रुपये इतकी होती. त्यापैकी शेतकऱ्यांच्या बँक खात्यावर ३४ हजार ७०७ कोटी रुपये जमा झाले आहेत.

१२५ कारखान्यांनी उसाच्या एफआरपीची १०० टक्के रक्कम दिली आहे. तथापि, उर्वरित ८६ कारखान्यांकडे अजूनही ८१७ कोटी रुपये एफआरपी थकित आहेत. ही रक्कम शेतकऱ्यांना मिळवून देण्यासाठी साखर आयुक्तालयाकडून पाठपुरावा सुरू आहे. त्याचाच भाग म्हणून आता पूर्ण एफआरपी न दिलेल्या कारखान्यांना साखर आयुक्तांनी नोटिसा बजावल्या आहेत.

ऊस उत्पादक शेतकरी व साखर कारखान्यांमध्ये एफआरपी देण्यासंदर्भात करार झाल्याचे काही कारखाने सांगत आहेत. सुनावणीदरम्यान त्यांनी दिलेल्या लेखी म्हणण्यामध्ये कराराचा तपशील, ठरलेल्या टप्प्यानुसार दिलेली एफआरपीची रक्कम याची माहिती साखर आयुक्तालयाकडून घेतली जाणार आहे. रक्कम देण्यास टाळाटाळ करणाऱ्या साखर कारखान्यांवर जप्तीची कारवाई करण्यात येणार असल्याचे साखर संचालक (अर्थ) यशवंत गिरी यांनी सांगितले.