अकोला ः भाजपचे प्रदेश सरचिटणीस तथा अकोला जिल्हाध्यक्ष आमदार रणधीर सावरकर (MLA Randhir Savarkar) यांची नानाजी देशमुख कृषी संजिवनी प्रकल्पाच्या (पोखरा) (POCRA) समितीवर तज्ज्ञ सल्लागार म्हणून पुन्हा नियुक्ती करण्यात आली आहे.

जागतिक बँकेच्या अर्थसहाय्यातून राज्यातील १५ जिल्ह्यांतील पाच हजारांवर गावांमध्ये पोखरा प्रकल्पाची अंमलबजावणी केली जात आहे. अकोला, अमरावती, बुलडाणा जिल्ह्यात विस्तारलेल्या खारपाण पट्ट्यातील समस्या निकाली काढण्याच्या दृष्टीने शेतकऱ्यांना मार्गदर्शन व विविध योजनेचा लाभ मिळवून देण्यासाठी ही समिती काम करीत असते.

मुख्यमंत्री असताना देवेंद्र फडणवीस यांनी सर्वात आधी तांत्रिक सल्लागार समिती सदस्य म्हणून आमदारसावरकर यांच्याकडे जबाबदारी दिली होती. आता सत्ता बदल झाल्यानंतर पुन्हा आमदार सावरकर यांना या समितीवर नेमण्यात आले आहे.

इतर जिल्ह्यांच्या तुलनेत जिल्ह्यात या प्रकल्पाची अंमलबजावणीची गती संथ आहे. निधी कमी प्रमाणात खर्च झालेला आहे. त्यामुळे स्वतःच्या जिल्ह्यापासून प्रकल्पाची गती वाढवण्याचे आव्हान आ. सावरकरांना पेलावे लागणार आहे.