Chhatrapati Sambhajinagar : ऐन कणसे पडण्याच्या स्थितीत मक्याचे पीक (maize Crop) वाळून जात आहे. ही बाब सोयगाव तालुक्यातील काही गावांमध्ये प्रकर्षाने पुढे आली आहे. गतवर्षीच्या हंगामात हा प्रकार कमी होता यंदा मात्र त्याची तीव्रता वाढली असल्याची माहिती शेतकऱ्यांनी दिली.

यंदा छत्रपती संभाजीनगर जिल्ह्यातील सोयगाव तालुक्यातील शेतकऱ्यांनी रब्बीत घेतलेल्या मका पिकांवर ऐन तुरे पडण्याच्या व कणसे लागण्याच्या अवस्थेत पीक खालून वरच्या दिशेने वाळत आहे.

तिडका येथील शेतकरी संतोष गायकवाड म्हणाले, ‘‘यंदा रब्बीत दोन एकर मका पीक घेतले. त्यापैकी जवळपास दीड एकरातील मका कणसे लागण्याच्या वेळी ९० टक्क्यांपेक्षा जास्त वाळून गेली. गेल्या वर्षी अशाप्रकारे मका वाळून जाण्याचे प्रमाण थोडे कमी होते.

यंदा मात्र जास्त आहे. पाण्याची कमतरता नाही. जमीनही मध्यम आहे. याविषयी कृषी विभागाला माहिती देणार आहे.’’

अंजोळा येथील सोमनाथ तुपे म्हणाले, ‘‘चार एकरांपैकी २५ टक्के मका आत्ताच वाळून गेली आहे. गावातीलच सुभाष दिवटे, भागिनाथ तुपे, गणेश भोसले, राजेंद्र निकम आदींच्याही मक्याची अशीच अवस्था आहे. जमीन भारी, हलकी, मध्यम कशीही असो पीक वाळून जात आहे.’’