यवतमाळ : लम्पी स्कीन चर्म आजाराचा (Lumpy Skin) प्रादुर्भाव नियंत्रणात आल्याचा दावा पशुसंवर्धन विभागाकडून केला जात असला, तरी याची तीव्रता वाढत असल्याने पशुपालक हवालदिल झाले आहेत.

गोट पॉक्स लसीकरणानंतर राज्यात ‘लम्पी स्कीन’ नियंत्रणात आल्याचा दावा पशुसंवर्धन विभागाकडून केला जात होता. मात्र पशुसंवर्धन विभागाचा हे सारे दावे फोल ठरले आहेत. लम्पी स्कीन विषाणूमध्ये सातत्याने बदल होत असल्याने त्यानुसार महाराष्ट्र पशू व मत्स्य विज्ञान विद्यापीठाला उपचार पद्धतीत देखील बदलाची शिफारस करावी लागत आहे. माफसूच्या सूचनानुसार उपचार पद्धतीवर भर दिला जात आहे. मात्र त्यानंतर देखील लम्पी स्कीन आजार नियंत्रणात येत नसल्याचे वास्तव आहे.

यवतमाळ जिल्ह्यात पशुवैद्यकीय शिक्षण घेणारे विद्यार्थी जनावरांवर उपचार करीत असून, माफसूच्या तीन टीम दाखल झाल्या आहेत. या सर्वांच्या माध्यमातून आजार नियंत्रणाचे प्रयत्न होत आहेत. मात्र आतापर्यंत २९० गावे कवेत घेतली आहेत. या ठिकाणची १७ हजार ३०३ जनावरे बाधित झाली आहेत. यातील १३,१३५ जनावरे बरी झाली. ३०८ जनावरे गंभीर आहेत. जिल्ह्यात आतापर्यंत १८९ बैल दगावले आहेत, तर १७६ गाईंचा मृत्यू झाला आहे. १५६ वासरांचा मृत्यू झाला असून, बैल दगावल्याने शेतीची कामे प्रभावित झाली आहेत.